[ame]http://www.youtube.com/watch?v=q8EQQsAi9Vs[/ame]
هاتجن يا ريت ياخوانا ما روحتش لندن ولا باريس
دي بلاد تمدين ونضافة وذوق ولطافة وحاجة تغيظ
ما لاقيتش جدع متعافى وحافى وماشى يقشر خص
ولا شحط مشمرخ أفندى معاه عود خلفه ونازل مص
ولا لب اسمر وسودانى وحمص وانزل يا تقزقيز
هاتجن يا ريت ياخوانا ما روحتش لندن ولا باريس
ولا واحدة فـ وش الفجر تبرطع مالية الدنيا صوات
قال ايه جوز خالتى أم أحمد سلفة أخوها السيد مات
سبحانك ما اعظم شانك والله الموت ده مفيد ولذيذ
هاتجن يا ريت ياخوانا ما روحتش لندن ولا باريس
ولا صايع طالع يجرى وصايع تانى بيجرى وراه
ويقول له ها هع حصلتك يابن اللى ابصر إيه عاملاه
لا الشارع غيط يا جماعة ولا احنا بدارة ولا احنا معيز
هاتجن يا ريت ياخوانا ما روحتش لندن ولا باريس
ولا عركة فـ نص الليل دايرة بالحيل وساحبها بوليس
قدامها جدع متجرجر وشه معور قال دا عريس
والخلق ما هى بتتجوز واشمعنى احنا مفيش تمييز
هاتجن يا ريت ياخوانا ما روحتش لندن ولا باريس
ولا واحد بيبيع حاجة يقول بريال وتاخدها بصاغ
ياخوانا دى حتى الإبرة تاخدها بدوشة وقلب دماغ
حلفان وعراك ومناهدة ويمكن ضرب كفوف يا حفيظ
هاتجن يا ريت ياخوانا ما روحتش لندن ولا باريس
29-07-2012, 10:13 PM
