نصيحه وتنبيه للبنات للشاعر مقيت بن عبدالله

أطلب الله وألتجي لله تايب
من خطاياي الثقيله والخفيفه

يا معين اللي يخاف من العقايب
أنت ملجاي من الأيام المخيفه

يا عضيد اللي يسدون النوايب
في نهار يذهل العالم رجيفه

يا ملاذ اللي يشوفون الغرايب
في زمان المنكرات بكل شيفه

يا منشّي من ثقال الماء سحايب
برقها يوحش اهل الدنيا رفيفه

أنت علام السريرة والسبايب
وأنت حلاّل الصعيبات الكليفه

بعدها حثوا بنا ممشى الركايب
ودّي أزين لي بيوت طريفه

استهاضت هاجسي نود الهبايب
يا بناتٍ طبع أهاليهم شريفه

اسمحي لي يا بنيّة كل شايب
ودي أنصح كل من مثلك عفيفه

لا يغرك من يسميكم حبايب
ويتقرّب بالسواليف اللطيفه

ينتقي بعض العبارات اللبايب
ويتتبعها بالأصوات النحيفه

يدّعي حبك وهو يا بنت خايب
مقصده تبقين بين الناس جيفه

مقصده يجرح شرف بنت القرايب
ثم بعدها كلٍ إيفارق وليفه

ما يجبّر كسرها الدمع الصبايب
لو تموت وهي مدامعها ذريفه

وش نعدّ من المشاكل والمصايب
في الخساس اللي مذاهبهم كسيفه

يا بنات أهل الحسب وأهل النسايب
احذروا من صاحب النفس الضعيفه

كيف ترضن الهزيعة والغلايب
وأنتم اللي صحفكم بيضٍ نظيفه

وأنتم أهل الستر مضفين الحجايب
كنزنا اللي حيّر أعدانا وصيفه

أطلب الله وألتجي لله تايب
من خطاياي الثقيلة والخفيفه