هل قص حجم المعده لانقاص الوزن بعمليه جراحيه له اثار سلبيه مستقبلا؟؟؟

السلام عليكم ورحمة الله ..
كل شي بالدنيا ذي يخالف العادة اكيد بيكون له عواقب تختلف وتتفاوت نسبة حدوثها من شخص الى آخر ..

كل شي بأمر الله هذا امر محسوم ولافيه جدال .. ولكن احبتي بالله لننظر ونتامل قليلا ..
فيه مضاعفات او مافيه بنهاية الأمر انت تبحث عن شي يعينك بعد الله على مجابهة حياتك ومجابهة كافة امورك العامة والخاصة ..
ببساطة فيه خلل عندك ولازم تسويه بطريقة او بأخرى ..!

التكميم هو قرار راح تحدده لإنهاء معاناة .. ولكن لازم تكون مقتنع فيه تماما ..

يعني لو بتدخل للعملية ذي وانت بداخلك ولو 1 بالمية بانك منت مقتنع او متشائم بانها تفشل او انك ماراح تنحف
صدقني ماراح تستفيد شي (( الحالة النفسية لها دور كبير )) ..

محاكيكم مسوي عملية التكميم من قبل ثلاث سنوات تقريبا ..
قبل العملية عشت بصراع مع النفس لايعلمه الا فاطر السموات والارض ..

وزني كان تقريبا 160 ..!
انواع الثقل والهم والطفش ..
بيرحون الزملا يتمشون ما اروح معهم خجل ،،
حساسية زايدة من وضعي اللي كنت عليه ..!

اقول بنفسي وين تروح انت وكرشتك ذي وحالتك مع الناس خلك ببيتك ازين ..!

ابغا اروح السوق اتقضى واتسوق زي باقي الخليقة ..
للاسف نفس الكلام يجيني :

بتروح السوق ..؟
طيب الناس لو شافوك وانت بالحجم ذا وش بيقولون ..؟!
الناس اذا شافوك والاطفال وغيرهم وش بيكون الوضع حزتها . ؟!

وارجع البيت وانطوي على حالي
الى حد ما وصلت لقناعة شخصية تامة بانني احاول اتخلص من هذا الشي
اللي منكد عيشتي ومانعني من ممارسة حياتي بالشكل الطبيعي ..

كنت خايف ..
الاعمار بيد الله سبحانه لكن النفس وتفاكيرها والشيطان اعوذ بالله منه ..

وسبحان الله اذا ربي اراد للعبد شي يسخره له جل جلاله ..
بيوم من الايام قابلت واحد من الزملا (صديق عمر) وعشرة سنين وجلست معاه جلسة مطولة
خلاني بطريقته الله يسعده اقول كل اللي بنفسي ..

هرجت هرجت هرجت وخرجت كل اللي فيني وهو يستمع بدون اي كلمة ..

وبعدها قالي فقط عبارة اثرت فيني وكانت بالنسبة لي نقطة تحول ارادها لي المولى عز وجل ولله الحمد والمنة .. قال :
انت الحين خايف انك تموت من العملية ..؟
طيب اسالك بالله انت الحين بعد ماسمعت منك كل اللي قلته ،
هل تعتبر نفسك حي ..؟!!
ماظنيت ..!

قالها وغادر يا اخوان والله انني جلست بعدها فاتح فمي
تقول طفل ينتظر الرضعة ..!

اراد الله وسخر لي سبحانه هذا اللقاء
ومن ثاني يوم تخاطبت مع الدكتور وحجزت موعد وتوجهت فورا
وسويت العملية (تكميم )..

اللهم لك الحمد اللهم لك الحمد اللهم لك الحمد نجحت ، وقمت من اول اسبوع ومارست حياتي بشكل طبيعي
وراحت الشحوم ذيك والحال ذاك والان وصلت للوزن المثالي 87
ويتارجح بينها وبين ال 90 وهذا طبيعي لانني طويل شوي والامور تمام بكل شي ..

كنت اعاني من ارتفاع السكر والضغط ..
ومن ثاني شهر ولله الحمد نسيت شكل الدوا اللي كنت اشتريه بالكراتين من منظم وابر وخلافه ..
اللهم لك الحمد اللهم لك الحمد اللهم لك الحمد ..
فضل من الله ونعمة لا احصيها ..

كنت احلم حلم انني البس لبس رياضة واعيش مع المسلمين اللي عايشة
والان دولابي ولله الحمد امتلا بدل اشكال والوان ..

(( الحرمان له مردود الله لايكتبه على مسلم ))..
واظن العبارة ذي كافية ووافية بحد ذاتها ..

مع انني قابلت ناس كثير متان ماشاء الله وانصحهم واعرض عليهم قصتي لكن هيهات ..!!
سبحان الله ماهمهم شي ولا هم مهتمين بالشي ذا بتاتا بل بالعكس بعضهم يقولي من زملا لي
(( ياخي والله انك كنت اجمل واكشخ وانت متين )) ..!!

عموما المقصد انه اللي متردد يسويها يتوكل على الله خاصة من اللي يعانون من السكر والضغط ..
الله يشفينا ويشفي جميع مرضى المسلمين ،،

اما اللي يبغا يسويها فضاوة وزيادة فلوس فاقوله ان الله فوق وينظر تعالى ويجازي كلا بعمله ونيته ..
لانني لقيت ناس عند الدكتور جايين يبغون يسوونها وهم اصلا نحاف
وماعندهم اي مشكلة فقط يبغون يسيرون نحاف لاجل اهداف ومآرب اخرى
نسال الله السلامة .