بقاله متوسط البيع اليومي 3000 ريال كم أرباحها الشهرية

المشاركة الأصلية كتبت بواسطة معشوقتي

المشاركة الأصلية كتبت بواسطة زير خان

له سنيين طويلة شغال بالمحل
وبسبب السعودة والقرارات الحديثة ممكن بيسافر
لكن ابغاك تحسبها لي بالورقة والقلم

المشاركة الأصلية كتبت بواسطة مقاادير

ابشر اخوي

ابتدي معك باهم نقطة واللي كثير من الناس يجهلها وهي الضريبة
اول شي البقالة اللي تبيع بالضريبة ,, الزبون ما عاد يدخلها
يعني انت تشتري بالضريبة وتبيع بدون ضريبة حتى لا تفقد زبونك
وبهذا السبب تفقد ارباح بيع الالبان والحليب مثل المراعي والصافي وووو ،، طبعا هذي سلع بيعها قوي ولها تصريف يومي

طبعا في سلع كثير مثل الالبان بتشتريها بالضريبة وتبيع بدون ضريبة وتتأثر من انخفاض الارباح لكن بشكل اقل من الالبان

ثاني اهم شي بالبقالة .. الدخان .. ما تبيع دخان ما يحتاج تفتح بقالة سكرها افضل لك
الدخان ايضا سلعة لا يعتمد على ارباح بيعها فهي سلعة تكميلية .. اللي جاي يشتري الدخان يوقف ياخذ شوي نواقص عنده بالبيت مرة وحدة

ايضا بطايق شحن الجوالات .. هذي ايضا تكميلية وليس لها ارباح .. اظن كل الف ريال بيع ربحها 8 ريال على ما اذكر

الان نجي لاهم سلعة تجيب الربح بالضعف والضعفين .. وهي حلويات الاطفال والمسليات
خل عندك تشكيلة ضخمة بحيث تجمع اطفال الحارة كلها عندك ويصير التسوق عندك حلم لكل طفل .. الورع يسحب ابوه يشتري اغراض البيت من عندك

اظن اني غطيت اهم جوانب السلع المتوفرة بالبقالة


نتوجه للمصاريف الحكومية
سجل تجاري .. اظن حول الف ريال سنوي شامل رسوم اشتراك الغرفة التجارية
رخصة بلدية ,, اظن حول 1500 ريال سنوي
الزكاة ،، تترواوح بين 2000 ريال الى 5000 ريال سنوي حسب المبيعات
كهرباء المحل .. اذا عندك ستة ثلاجات وثلاث مكيفات وهي اقل شي لبقالة ناجحة بتكون الكهرباء عندك متوسط شهري بين صيف وشتاء حول 1500 ريال
ايجار المحل ،، هذا موضوعها عندك وانت وحظك فيها
اقامات العمال اذا عددهم اثنين .. اذا انت ما عندك الا هالعمال الاثنين بتكون اقامتهم حول 750 ريال سنوي وامرها سهل .. لكن لو عندك عمال اكثر من اربعة تصير تحسب لكل عامل حول عشر الاف ريال اقامة
تامين طبي حول 400 لكل عامل
رواتب للعمال كل عامل من باب نازل الفين ريال وعساك سالم من سرقتهم ولا احط احد بذمتي
عندك ابشر الاعمال صار برسوم سنوية اقلها 105 ريال تزيد بازدياد عدد العمال


الان نتكلم بالمنتهي الصلاحية والمخالفات
السلعة اللي تنتهي صلاحيتها هي اكبر اسباب خساير البقالة .. كرتون تونة تشتريه جمله تخرب منه حبتين انت تكون خسرت ارباح الكرتون كله ! ومثله اصناف كثير
فوق انك تخسرها بسبب انتهاء الصلاحية وتنساها عالرف وتجيك البلدية تصكك مخالفة الف ريال

البلدية اي زيارة لها لازم لازم تطلع بمخالفة اقلها خمسمائة ريال اللي هي نظافة
يستقعد لك يدور اي مكان وسخ بالبقالة ويصك مخالفة
مثال اخر رخصة البلدية كل شي جديد بس انك ما علقتها عالجدار .. مخالفة
شهادة صحية للعمال ايضا مخالفة
كرتون ماء عالارض تاخذ مخالفة
صفاعة الذبان اللي فيها لمبات زرق .. لمبة وحدة خربان تربح مخالفة ,, نسيت تشغلها وقت الزيارة الميمونة ايضا مخالفة
الستارة الهوائية اللي عالباب تبع البقالة .. ما تشغلها مخالفة

احس اني ناسي اشيا واجد .. اترك لك شغف الاكتشاف


الله يسر امرك

المشاركة الأصلية كتبت بواسطة captin999

قديما كان صافي الربح 20%

لا اعلم ان كان تغير في هالزمن

المشاركة الأصلية كتبت بواسطة al_lazzam

ان كانت بقاله معروضه عليك لعدم التفرغ انتبه من النصب فيها


لا ينصب عليك الاجنبي

اتركها حتى تعرض للايجار وخذها ببلاش من صاحبها الاول باجار اقل وبدون دفع تكاليف مواد غذائيه


------------------

ولا تنسى شي مهم

البقاله ان لم تجلس انت بها بنفسك واكرر بنفسك فلا تقربها نهائي لانك سوف تكون

عرضة

1- للنصب من قبل العامل
2- اغلب العماله يبيع المواد لحسابه الخاصة
3- قبل هروبه سوف ينزل بضاعه باسم السجل للبقاله باسمك ويصرف البضاعه ويسرق قيمتها وعليك انت ان تسددها

4- الانظمة الجديده تحارب ان يكون العامل اجنبي بالبقالات وهذا سوف يعرضك للمسائله القانونيه



الخلاصة

ان لم تكن انت من يحاسب بالبقاله لا تقربها

لا تدخل المحل التجاري عن طريق التقبيل للمحل بل ادخله بعقد جديد بعدما ينتهى المستاجر الاول بشكل نهائي