سيارة باسمي وبلغت عليها سرقة واشتكى علي الحرامي

صفحة 1 من 5

01-09-2019, 03:14 AM

المشاركه #1

JohnnyS

عضو هوامير المميز

تاريخ التسجيل: Sep 2016

المشاركات: 1,199

سيارة باسمي وبلغت عليها سرقة واشتكى علي الحرامي

السلام عليكم
طبعا هو ماهو حرامي بس ماهو بعيد عنه وبعلمكم القصة
اعرفه من الجماعه الله يبليه اتصل علي وقالي حصلت سيارة لقطه وبالله بسجلها باسمك وبعدين انقلها قلت بسوي فيه خير ، معي اني حريص على الامور هاذي لاسمح الله صدم طفل وهرب او استخدمها بامور تضرني المهم كل يوم يافلان مشينا للمعارض ننقلها ... بعدين ، وتمر الايام يافلان مشينا ترا سويت فيك خير لاتنكبني .. ورده ماعليك بس بصلح فيها عشان الفحص الدوري

المهم وصلت اني انا بدفع له قيمة النقل بس يفكني قفل جواله وحط رجله وبلغت سرقة عليها
ومر شهر وصادو السياره ونقلوها للقسم .. راح هناك وحلف للضابط انها له وان البلاغ كيدي .. تحولت الى المحكمه وطلب من للقاضي اخراج السياره من القسم ونقل ملكيتها له وتعويض عن الاضرار

الجلسه بعد اسبوع وش اسوي انا وش راح يقول لي القاضي مابي منه شي فقط ينقلها ويقلب وجهه

انا اعترف اني اخطيت ولكن سويت فيه معروف وهو شخص مسكين وراعي اسره

الموضوع الأصلي : اضغط هنا || المصدر :
ساحات الهوامير المفتوحة

01-09-2019, 03:20 AM

المشاركه #2

المتوكل101

عضو موقوف

تاريخ التسجيل: Aug 2018

المشاركات: 2,099

الله يجازي هالاشكال هم السبب في امتناع كثير من الناس عن فعل المعروف ... يخلوا اهل الخير يكرهوا الساعة اللي يقدموا فيها مساعدة لاحد و يفكوا زنقة لاحد الله لا يعطيه عافية لا هو و لا امثاله

01-09-2019, 03:46 AM

المشاركه #3

JohnnyS

عضو هوامير المميز

تاريخ التسجيل: Sep 2016

المشاركات: 1,199

اقتباس:

المشاركة الأصلية كتبت بواسطة المتوكل101

امين الله لايوفقه والله صرت اخاف اسوي جماله في احد من بعد اليوم

بس يااخوان انا متخوف وش اقول للقاضي ؟ اقوله اني اطرده بالشوارع عشان ينقلها وهو يتجاهلني ؟ وهل انا معي حق في الابلاغ عن السياره ؟

01-09-2019, 03:53 AM

المشاركه #4

irobot

عضو موقوف

تاريخ التسجيل: Oct 2014

المشاركات: 8,294

والله مشكله
اذا قلت انه سارقها راح فيها الرجال وتكون ظلمته
و اذا اعترفت باللي صار يمكن تتورط ببلاغ كاذب

سؤال : الرجال اللي اخذ السياره بالحجز الأن ؟

أقتباس
تحولت الى المحكمه وطلب من للقاضي اخراج السياره من القسم ونقل ملكيتها له وتعويض عن الاضرار

والله مايستحي على دمه

انصحك تشرح للقاضي كل شي ، وان شاء الله يكون حكيم ويتفهم وضعك .

01-09-2019, 03:58 AM

المشاركه #5

JohnnyS

عضو هوامير المميز

تاريخ التسجيل: Sep 2016

المشاركات: 1,199

اقتباس:

المشاركة الأصلية كتبت بواسطة f.a.h.a.d

والله مشكله
اذا قلت انه سارقها راح فيها الرجال وتكون ظلمته
و اذا اعترفت باللي صار يمكن تتورط ببلاغ كاذب

سؤال : الرجال اللي اخذ السياره بالحجز الأن ؟

والله مايستحي على دمه

انصحك تشرح للقاضي كل شي ، وان شاء الله يكون حكيم ويتفهم وضعك .

الرجال ماهو بالحجز صادو السيارة واقفه عند البيت واخذوها وبنفس اليوم راجع الشرطه وقالهم انا صاحب السياره

انا لمى سويت البلاغ حطيته ضد مجهول وقلت للشرطه ان السياره مادري وينها ... وانا صحيح ماعلم وينها وخفت اتهمه شخصيا ويروح يرميها بمكان ويقول ماهو انا وهذا يتهمني كيدي
عشان كذا مابغيت اتهم شخص معين
راجعت قسم الشرطة وبلغوني ان السياره موجوده وان شخص رف علي محضر كيدي
وقال لي العسكري انت بايعها ومبلغ عليها؟ قلت لا والله انا اطرده بالشوارع عشان ينقلها ... قالي تحولت للمحكمه وتفاهمو هناك

01-09-2019, 04:16 AM

المشاركه #6

qahtani999

عضو هوامير المميز

تاريخ التسجيل: May 2013

المشاركات: 6,828

فيه بلاغ تغيب و انت بلغت سرقة
يعني اشغلت الدولة و سحبوا السيارة على حسابهم و رفع بصمات و فلم هندي كوميدي
وبالنهاية بلاغ كيدي
الله يفشلك
المشكلة انك تشوف معك الحق يا وجه البومه هههه
قول لهم كنت ابغاه بلاغ تغيب و لجهلي بالنظام تم وضع البلاغ سرقه
و السبب ان السيارة باسمك و طالبت صاحبها الفعلي بنقل ملكيتها و كان يماطلك و هذي مخالفة للنظام و فيها ضرر عليك
وسلامتك والباقي يتصرف فيه القاضي و غالبا صرف نظر
احسن من ازعاج سلطات و بلاغ كاذب

01-09-2019, 04:55 AM

المشاركه #7

JohnnyS

عضو هوامير المميز

تاريخ التسجيل: Sep 2016

المشاركات: 1,199

اقتباس:

المشاركة الأصلية كتبت بواسطة qahtani999

تغيب؟ ليه السياره مشت لحالها واختفت
شيبهك قفل جواله وحط رجله يعتبر سرقة بالله عليك سطى عليها مسلح من اللي ياكلها انا ولا هو؟
هذا مو ازعاج للسلطات هذا حماية لنفسي انا الى الان اشوف الحق معي بس الحين انت جاي تتشمت انا ابي اعرف الشرطة وش راح يسوون لي بعد الجلسة لاني بعلم القاضي انه هرب ورفض نقل ملكيتها واضطريت ابلغ

01-09-2019, 05:32 AM

المشاركه #8

قلبي معك

عضو هوامير المميز

تاريخ التسجيل: Jan 2017

المشاركات: 8,234

نعم سارق وغشاش ونذل وكل الصفات الشينة فيه
مشكلتنا نخاف من المحكمة والحق معنا !!!!
روح للقاضي واحضر الجلسة ورأسك الطويل
وقول السيارة لي وبأسمي وان كانهي له يحلف وينقلها هالحين وأنا مصدّق حلفه
والله لو أني مكانك لأخذها منه غصب عنه عند المحكمة وابيعها وطز فيه وفاللي خلفوه
قو نفسك وقل هذي سيارتي باسمي هاتوها مالكم شي وشوف كيف يبوس رجلك
واللي يحطك عند خشم العير حطه عند ذنبه

01-09-2019, 05:46 AM

المشاركه #9

المغامر 2029

عضو هوامير المؤسس

تاريخ التسجيل: Aug 2005

المشاركات: 57,624

عادي قل السياره بأسمي واي مشكله راح اتورط انا فيها ومن باب الفزعه خليتها

يسوقها الى ماانقلها باسمه اختفى الرجل والسياره ومن باب حفظ وسلامة موقفي

ضد اي مصيبه ممكن تصير بعدم نقل السياره بأسمه او تفويضه تم الابلاغ

01-09-2019, 05:57 AM

المشاركه #10

نيترون

عضو هوامير المميز

تاريخ التسجيل: Jul 2006

المشاركات: 6,699

أول سؤال راح يسألك القاضي
س/ تقول أنه هو حصل سيارة لقطة وطلب يحطها بإسمك .
وش السبب الي خلاه يحطها باسمك و ليس باسمه ؟

01-09-2019, 05:57 AM

المشاركه #11

اندبندنتي

عضو هوامير المميز

تاريخ التسجيل: Jun 2015

المشاركات: 13,194

انت مشكلتك ماعندك ثقة في وضعك السليم ١٠٠ %
وضعفك بيوديك في داهية ..

خليك صريح وصادق امام القاضي انك المفروض المدعي
الرجل وضعها باسمك ولكنه عقد النية والعزم
ان يستغلك ماديا ومعنويا
١ _ يريد دفعك رسوم نقل الملكية فيما بعد!!
٢- مخالفات المرور ان وقعت تكون عليك !
٣_ اي جناية أو حادثة تكون انت المسؤول !!
٤_ إقفال الجوال وعدم الرد عليك أكبر دليل على ان الرجل لايمكن الوثوق به وانك على وشك التورط بشئ سيئ !!
٥- مماطلته لك و المدة الطويلة من الزمن شهر او اكثر
تجاه ان ينقلها باسمه!
٦- استغل صلة القرابة أسوء استغلال ولم يلتزم بما تعهد به امامك ٠
فكان انسب حل حتى لا تقع في المشاكل ان تقوم بإبلاغ السلطات لإخلاء مسؤوليتك الرجل مقفل والسيارة ليست امام ناظريك وحتى لا تتحمل أعباء نقل الملكية ،
أطلب ان يلزمه القاضي بسداد اي مخالفة عليها و كذلك
النقل والتعويض المادي والنفسي عن ماسبق لك من القلق والخوف مما لا يحمد عقباه

لاتنسى ترى القاضي بيقتنع اذا كتبت ١ و٢ و٣ و٠٠٠ في محضر الدعوى ووقعت عليه

حول لي ٥٠٠ ريال لك رسالة على الخاص

01-09-2019, 06:03 AM

المشاركه #12

رجل من الصحراء

عضو هوامير المميز

تاريخ التسجيل: Dec 2012

المشاركات: 1,622

قل لا اله الا الله

1- اشرح للقاضي السالفة من اولها الى تاليها وخبره انك عملت معروف والادمي قابله بالنكران وهرب وخبره انك كنت بتدفع قيمة النقل وانك تطارد وراه وتتصل ويقفل جواله
كل شيء اذكره للقاضي وخبره بعد انك تضررت نفسيا" وسبب لك توتر وقلق وصرت اوسوس لا يكون من يلغم السيارة ويفجر ولا لا يكون حرامي ويسوي فيها جريمة سطو ولا لا يفعل ويفعل قل بهذلني قال يومين واصبحت شهور

واخرتها اختفى وهل جزاء الاحسان الا الاحسان

وهل لو تحملت مخالفات مرورية هل كان ممكن ان يسددها وهو لم يفي بنقل السيارة

وياقاضي هل لو عمل فيها جرم هل كنتم سوف ترحموني بل سوف اعاقب على احساني اشد العقاب

واطلب في النهاية حلف اليمين خله يحلف اليمين على ما حصل انه طلب منك الفزعة لايام معدودة وسحب عليك

وخله يحلف انه انت ما اتصلت فيه وطاردت وراه عشان ينقل السيارة

وفي النهاية اذا خربها طالب بتعويضك مقابل الحاق الضرر بك بسبب احسانك له فهو لم يوفي بالاتفاق واصبح العمل اضرار بك وبوقتك ونفسيتك تضررت واصبحت فيها محاكم وشرطة كل هذا بعدم الالتزام بالاتفاق

واذا انت صادق احلف اليمين اذا طلب القاضي ذلك

عانك الله واصلح صاحبك وشاكلته

صفحة 1 من 5

الكلمات الدلالية (Tags)

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة قوانين المنتدى

الانتقال السريع

اجعل كافة الأقسام مقروءة

09:25 AM

سيارة باسمي وبلغت عليها سرقة واشتكى علي الحرامي

ساحات الهوامير المفتوحة

واشتكى

وبلغت

الحرامي

باسمي

سيارة

سرقة

عليها

اقرا ايضا

★★★ " كونوا على حذر " ثغرة خطيرة في بطاقة الصراف الآلي ★★★

لكزس es300 قطعت ما يقارب مليون كم ولازالت بحالة ممتازة