للاسف حصل معي.. والمشكلة قريب لي.. حلف بالله واقسم يمين .انه بيردها الشهر القادم.. وانا اعرفه واعرف تعامله من قبل.. لكن حلف بالله العظيم.. ان عنده جمعيه ودوره يكون الشهر القادم.. وقال ابيك تسلفني الان ضرورري محتاجها.. وأول ماتجيني فلوس الجمعيه بعطيك اياه.. وانا من حرصي الشديد.. قلت هالمبلغ صعب عليك ترجعه واكررها عليه ثلاث ايام وهو يلح علي ويحلف يمين اني بردها لك الشهر الجاي.. وسبحان الله ..ماادري كيف وافقت على طلبه وطلب عشره الآف ريال....هل لحلفه والقسم اللي قال وإنها في ذمتي..! وافقت وحتى بدون اي ورقه .. والمشكله ارددها له تقدر ترجعها المبلغ كبير عليك.. تقدر تقدر لا توهقني انا مجمعها ومحتاجها.. قال ابد وفي ذمتي الشهر الجاي في حسابك… قلت خلاص واسلفه.. وانتظر عليه شهر.. واكلمه. هاا يافلان استلمت الجمعيه.. حولها على حسابي.. قال ابشر.. واخذ يومين ماحول واكلمه ..يافلان وينك وين الدراهم.. قال نهايه الاسبوع وهي بحسابك.. وانتظر يومين ..واكلمه يافلان وينك وين فلوسي.. بدأ يلف ويدور.. وخذ من الاعذار.. وانا حال علي الايجار واهلي بيطلعهم صاحب الشقه والفلوس الجمعيه سددت الايجار فيها.. اصبر علي اتسلف واسددك وانا وانا...وبعدها احاول اتصل عليه قفل الجوال ولا يرد علي..
الان لي سنه وانا اطرد وراه.. حتى قلت ماتقدر واذا ظروفك ماتساعد
قسطها .. سدد كل شهر 500 ريال
والله كأنه مايعرفني للاسف وهو قريب.. الان افكر هل انتقم منه وهو قريبي ..هل ارفع فيه شكوى.. وهل وهل..!
والله اني ندمت اني سلفته.. لكن لعلها خيرة .. والمشكله اذا فيه مناسبه او شي يتهرب مني مايبي يقابلني وكأني عدو ..بعدهاااا خلاص قررت ما اسلف اي مخلوق او اكفل احد..
وانا احس اني غلطت ماكان بيننا ورقه عالاقل تحفظ الحقوق وبنفس الوقت قريب لك.. وانا بقرارت نفسي ماني مسامحه ..