بطاقتي انتهت في رمضان والبنوك ترسل تهدد بتجميد حساباتي ومحفظة تداول ماعاد اقدر اشتري مجرد بيع فقط نسأل الله العافيه المهم كل شوي ادخل ع ابشر واشوف فيه مواعيد ويظهر لي ان ما فيه مواعيد بالدمام للفرعين واحاول عالخبر فرعين أيضاً وما فيه مواعيد وعقبها عالقطيف ثم بقيق ثم الجبيل ثم الاحساء وما فيه مواعيد أبداً وبحثت حصلت مواعيد مفتوحه في النعيريه 250 كيلو من الدمام يعني 500 كيلو رايح جاي وسويت موعد يوم الثلاثاء القادم الساعه 2 الظهر .
اليوم رحت مع ولدي عقب صلاة الظهر ع المركز الرئيسي للاحوال اللي بحي الاتصالات ودخلت بدون أي موعد وبدون أي تعقيدات ومسكت سرى مع الناس ( ما كان العدد كبير ) والغالبيه بدون موعد واعطوني رقم وانتظرنا حتى زهموا علينا وصوروني وبصموني وما طلبوا أي شي وقالوا البطاقه تستلمها ان شاء الله عقب خمسه أيام لذلك اللي يبي أي شي من الاحوال يروح بنفسه لا ينتظر موعد خاصه اذا كان في مدينه كبيره مثل الرياض والدمام وغيرها.
نسيت لا أقول ان لهم حساب لخدمة العملاء ع تويتر ما ينفع بهلله راسلتهم من قبل وارسلوا لي ايميل للدعم يقولون راسل الاحوال على هالايميل وارسلت لهم رساله وما ردوا علي ورجعت وراسلت حساب الاحوال ع تويتر وما ردوا علي لذلك لا تنتظر منهم شي ابد روح بنفسك وان شاء الله تخلص أمورك.