logo


قديم 08-12-2020, 11:40 AM
  المشاركه #1
عضو هوامير المميز
تاريخ التسجيل: Oct 2019
المشاركات: 348
 



السلام عليكم ورحمة الله

صباح الخير

في هالزمن ومع كثرة الملهيات وتشتت التفكير انتشر النسيان بشكل كبير فلم يعد محصورا على كبار السن بل تجده منتشرا عند الشباب
وبعض الأطفال لدرجة صار فيه شيء أسمه زهايمر مبكرة >>> من راسي لا تصدقونها

وأكيد كل واحد مر بموقف في حياته وممكن يكون متكرر فإما يبحث عن الجوال وهو بيده
والا يبحث عن المفتاح وهو بيده
والا ينسى المفتاح على باب البيت الخارجي.....الخ

قبل شوي صار لي موقف غريب

كنت رايح أزور قريب لي في المستشفى مسوي عملية الله يشفيه ولما دخلت المواقف هاجمني مجموعة من البنقلاديشين وكل واحد يبغى يغسل سيارتي عاد شافوا الماي باخ حقي وطمعوا فيني >>> ايه هين

اخترت لي بنقلاديشي ابن اجواد قال بغسل سيارتك بس ترى بجلس لمدة ساعة وحدة أو أقل (اذا فيه انتا تاخير انا فيه روه) يعني اذا تأخرت انا بروح فقلت له ما راح أطول نصف ساعة ان شاء الله وبكون عندك وطبعا ابغاه فقط يغسل الخارجي لان المفتاح معي قصدي الريموت لأن السيارة ببصمة

ولما رجعت من زيارة قريبي واشوف سيارتي مفتحه بيبانها وقلت يا ولد وش السالفة انا مقفلها
يوم لقيت البنقلاديشي مطلع الدعاسات وينفضها ولا سألته قلت يمكن اكون ناسي اقفل الأبواب
لكن المصيبة اني لقيت السيارة شغالة والمكيف شغال
والبنقلاديشي يقول انته ليه في خلي سياره شغال ايس فيه
قلت لا عشان انا فيه ثقه انتا وبعدين انا فيه يرجع سرعه

الحمد لله ما طارت سيارتي واللي يغسل سيارتي طلع اجودي وأكرمته لأنه ما نكد علي يومي ولطش سيارتي

يالله المايك معكم وكل واحد يعطينا موقف له مع النسيان

مع السلامة يا حلوين

الموضوع الأصلي : اضغط هنا    ||   المصدر :

ساحات الهوامير المفتوحة



 
 
قديم 08-12-2020, 11:56 AM
  المشاركه #2
عضو هوامير المميز
تاريخ التسجيل: Feb 2019
المشاركات: 613
 



من مما اتذكر صديق لي كنت متواعد معه على مكان نروح له سويةٍ ف اتفقنا على ان يوقف سيارته في مواقف امام احد المنازل قريب من بيتي ويركب معي ونذهب
فعلاً وقف وركب معي وذهبنا من صلاة المغرب الى حين الرجوع الساعه تقريباً 12 او 1
ولما قربنا من سيارته وجدناها شغاله وفيها المفاتيح والباب مغلق لكن تستطيع فتحه
سبحان الله لم تسرق ولم ينتبه لها احد لكي يطفأها او يسرقها او يخلص مشاويره ويرجعها او او او

اما عن النسيان اليومي فلا يخلو من مفتاح نزاره بوك قلم فلوس وغيرها




قديم 08-12-2020, 12:08 PM
  المشاركه #3
عضو هوامير المميز
تاريخ التسجيل: Nov 2015
المشاركات: 567
 



والله صارت لي

كان عندي مشكلة متعبتني وجابت لي القلق و الهم
من زود التفكير كنت اخذ حبتين دواء حق حساسيه بس عشان انام
وانام ساعتين ولا ثلاث واقوم

رحت لمطعم شاورما أخذت طلبي وباطلع
أدور المفاتيح والله ماهي بالجيوب
رجعت للطاوله اللي جلست عليها ماهي فيه
سقطت عالعالم عند الكاشير ..يا محمد ما شفت مفاتيح قال لا
آخرتها العمال يدورون وأنا أدور وزبون يدور معنا والله مافي شيء

قلت يا ولد لا اكون قفلت عليها بالسياره
طلعت للسياره ... الا سيارتي قدام المحل بابها مفتوح على مصراعيه وشغاله وفي شارع تجاري ولها نص ساعه تقريبا... بس أدخل وعشق والله ماحد بيدري عنك
والعمال كلهم يطلعون فيني من جوا واجهه القزاز

والله من قو الفشيله تركت طلبي بالمطعم
ومشيت




قديم 08-12-2020, 12:10 PM
  المشاركه #4
عضو هوامير المميز
تاريخ التسجيل: Feb 2019
المشاركات: 613
 



اقتباس:
المشاركة الأصلية كتبت بواسطة levii
من مما اتذكر صديق لي كنت متواعد معه على مكان نروح له سويةٍ ف اتفقنا على ان يوقف سيارته في مواقف امام احد المنازل قريب من بيتي ويركب معي ونذهب
فعلاً وقف وركب معي وذهبنا من صلاة المغرب الى حين الرجوع الساعه تقريباً 12 او 1
ولما قربنا من سيارته وجدناها شغاله وفيها المفاتيح والباب مغلق لكن تستطيع فتحه
سبحان الله لم تسرق ولم ينتبه لها احد لكي يطفأها او يسرقها او يخلص مشاويره ويرجعها او او او

اما عن النسيان اليومي فلا يخلو من مفتاح نزاره بوك قلم فلوس وغيرها
نظاره ** تعديل




قديم 08-12-2020, 12:48 PM
  المشاركه #5
عضو هوامير المميز
تاريخ التسجيل: Oct 2010
المشاركات: 6,132
 



رحت بالسيارة للمسجد قريب من البيت ، بعد الصلاة رحت للبيت مشي .... نسيت السيارة.
بعد كم ساعة طلعت بروح لمشوار ولالقيتها عند الباب ، انجنيت ، السيارة انسرقت واطلع الجوال ببلغ المرور وتذكرت أني ناسيها عند المسجد
والله كانت فرحة




قديم 08-12-2020, 01:07 PM
  المشاركه #6
عضو هوامير المميز
تاريخ التسجيل: Sep 2020
المشاركات: 660
 



يقول وقفت عند بقالة وخليت السيارة شغالة بلقط غرض على السريع وبمشي لما طلعت من البقالة ومع إنشغال البال (يالله لا تشغلنا عن طاعتك) ركبت بسرعة موتر يشبه موتري بالضبط وشغال ما طفاه راعيه زيي، المصيبة ما اكتشفت إنه مهوب موتري إلا بعد ما مشيت 2 كم تقريباُ لأني دورت نظارتي الشمسية وما لقيتها وعلى طول رجعت للبقالة وأشوا لقيت راعي الموتر ينتظر عند موتري ويقول توقعت إنك أنت اللي لقطته لما شفت مواترنا تشابه وموترك واقف شغال!



قديم 08-12-2020, 02:15 PM
  المشاركه #7
عضو هوامير المميز
تاريخ التسجيل: Sep 2008
المشاركات: 639
 



كنت مسافر ومستأجر سياره وعند موعد العوده باقي على الرحله ساعتين وانا احط اغراضي في شنطة السياره نسيت المفتاح فيها والابواب مقفله وكان موقف صعب وناديت العمال في الفندق للمساعده وجابوا عدة السباكه ما يصلح منها شيء وقررت اكسر الزجاج وبالصدفه مر واحد اجودي واقترح ادخال سيم من جنب الباب وضغط الزر حق الشنطه ونجحت العمليه وانفتحت الشنطه . ولحقت على الطائرة في اخر لحظه.



قديم 08-12-2020, 02:18 PM
  المشاركه #8
عضو هوامير المميز
تاريخ التسجيل: Dec 2013
المشاركات: 2,099
 



فيه مرة كنت ادور على النظارة وانا لابسها هههههههههههههههه



قديم 08-12-2020, 03:33 PM
  المشاركه #9
عضو هوامير المميز
تاريخ التسجيل: May 2014
المشاركات: 677
 



قبل 18 سنة عندي اغراض ابسلمها لعامل عندنا هو ساكن بالهفوف وانا بالرياض ، تواعدت معه انتناصف المشوار ومكان الالتقاء هجرة اسمها خريص تبعد عن الرياض 150 كيلو وكذلك نفس المسافة عن الهفوف وصلنا تقريبا بنفس الوقت وعطيته اللي معي ، هو مشى لديرته وانا وقفت اصلي واخذت شاهي ومسكت الطريق لديرتي وانا ماشي والهواجيس تودي وتجيب فيني والا اشوف العامل يمشي قدامي استغربت وش عنده ذا راجع للرياض ضربت له بوري ووقفته وسألته وش عندك رايح الرياض ؟ طبعا شفت على وجهه علامات تعجب واستغراب وانا قلت بقلبي هذا اكيد وراه بلا ، قال انت اللي لاحقني للهفوف قلت انت متاكد ، قال متاكد ، الصراحة تفشلت منه واللي حصل ان الطريق كان سايد واحد رايح جاي وانا يوم بغيت ارجع استدار راسي واخذت عكس طريقي وقطعت قرابة 60 كيلو ولو لا الله ثم اني شفت العامل يمشي قدامي ولاكان ماردني الا الأمارات .



قديم 08-12-2020, 03:42 PM
  المشاركه #10
عضو هوامير المميز
تاريخ التسجيل: Oct 2009
المشاركات: 7,979
 



روى مسلم في الصحيح وأصله في الصحيحين إذا قال: سبحان الله وبحمده مائة مرة، غفرت خطاياه وإن كانت مثل زبد البحر، وفي لفظ آخر: من قال حين يصبح وحين يمسي، سبحان الله وبحمده مائة مرة، غفرت خطاياه وإن كانت مثل زبد البحر،




قديم 08-12-2020, 04:19 PM
  المشاركه #11
عضو هوامير المميز
تاريخ التسجيل: Feb 2013
المشاركات: 4,271
 



فيه نسيان عن نسيان يفرق .. غالباً كثرة النسيان تكون بسبب الضغوط الشديدة التي يتعرض لها الشخص اما في عمله او دراسته او حياته الاجتماعية بشكل عام وهي سلاح يستعمله العقل للحفاظ على نفسه من التلف وكثرة التفكير .. النسيان في احيان كثيرة نعمة



قديم 08-12-2020, 04:28 PM
  المشاركه #12
عضو هوامير المؤسس
تاريخ التسجيل: Sep 2005
المشاركات: 608
 



موقف محرج لا احسد عليه
كنّا مسافرين طريق طويل ( بر )
ومعنا كبير سن الله يرحمه توفي الان - قال هالشايب وقف نبي نصلي المغرب .. قلت سم

مفتاح السياره كان معي لحاله لاميداليه ولاشي .
نزلنا وطفيت السياره .. وصلينا المغرب والعشاء جمعاً واظلمت الدنيا .. ركبنا السياره ادور المفتاح
الى يومنا هذه مدري وين راح .. ضاااااااع

رجعنا سطحه 😂😂😂😂







الكلمات الدلالية (Tags)

مواقف

,

مفتاح

,

النسيان

,

سيارة

,

سيارةجوال

,

شغالةالخ

,

طريفة

,

قليل


أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع



07:15 AM