السلام عليكم ورحمة الله وبركاته ..
سوقنا اسميته منذ زمن بسوق الحسايف في معضم الحالات تصيبك اللوعه والقهر ان بعت وارتفع انقهرت وان شريت ونزل مت قهر وان ماشريت وارتفع ولعت وأن ونن
كأننا نحرق في اعصابنا وبفلوسنا ولهذا حرم ديننا الحنيف المقامره لأنك تعمل بالتنجيم
المهم لي ثلاث سنوات مع السوق وكبرت في اول سنه وكنت اضن نفسي ذكي وشاطر وكان عندي متجر يدر علي ارباح شهريه يجي لها سبعه الاف بعته قلت هذا مو وقت سبعة الاف هذا وقت مئات الالوف هههههههههه
وحطيت فلوسه في السوق وكبرت وبديت احلم بالملايين وبدون سابق انذار دحدر السوق وخسرت خمسين بالمئه قلت لا بااعوضها دخلت دورات وبديت هه افهم شوي
قلت لا باارجع اللي رااح ومره ثانيه والا والسوق مدحدر ياالله وشفيه هالسوق مايقدر طموحاتي المهم كنت افرك من العمل واقابل الشاشه وكل همي ارجع فليساتي اللي طارت مااطول عليكم دخلت احدى الدوراات مؤخرا علي احل المشكله واشوف يمكن السوق يبي له دراسه متعمقه ومن اول يوم بالدوره قلت بااجرب المتوسطات وخساره سبعه بالمئه قلت لا المتوسطات خطيره ماتنضمن خلك مع البولنجر واذا ضاق اشتر وينفرج وينفجر وتجيك فلووووس وطبقتها والاهو منفرج حدر وراحت ثلثه بالميه وش السالفه قلت اجرب الزقزاق مع خويه ذاك باربوليك ولا الدعوه كلها
أن تحرك المؤشرات يتبع حركة السهم يعني التحليل دايم يجي بعدين بعد الخساير يقولون لو راقبت شمعة الرجل الاخضر وبعت كان ماخسرت ياشيخ قوم بلا تحليل بلا كلام نادر مايصدق .....
اخيرا قررت ايش قررت تدروون ايش قررت وبعد التشاور والتداول والاخذ والعطا ولما شفت اني صحيا مدحدر مثل المؤشر قلت لنفسي الفلوووس اللي في السوق الله يعوضني فيها وكأنها ماهيب لي وتركتها في سهم خسرني كثيرا وبااوصيكم عليه وباابعد عن السوق واشوف حياتي وصحتي وعيالي اللي غريب عنهم وانا وسط البيت بسبب سوق الحسايف واكبر دلييل ان سوقنا الله بلخير تصريحات صاحب السميارات وماعنده الا الخرطي والغش والتضلييل خلاص تعبت وبااترك لك السوق والملعب وبااتفرج كل شهر مره يمكن يرجع بريق السوق ويغريني او يااخذون الباقي حار ونار على قلوبهم ...
وبااتعالج من الجروح والكدماات وادمان مرهق لايجيب الا الهم والغم والبعد عن الله
ماانا كنت كويس كان مالي ومال البورصه لابارك الله فيهم ولا في بورصتهم وابد هذى والله مشاعر حبيت افرغها هنا وزي مايقولوون غيض من فيض والحمد لله اني قررت وانا بكامل قواي العقليه قبل مايطير عقلي وان شفتوني معتب اطردوني
والسلام خوتام ...
المقر بما فيه سين ميم عين
31-01-2007, 01:11 AM
