حياكم الله في جزء اخر من رحلتنا فى جنوب افريقيا
نمنا وصحينا اليوم الثاني وكانت اغراضنا جاهزة ... سوينا الشك اوت وركبنا سيارتنا وبسم الله الى كيب تاون
ومشينا في الطريق ومرينا تغدينا وكملنا المشوار وفي الطريق قابلنا موقف عجيب .... مستحيل انك تشوف زيه في كل البلاد العربية وبعض البلدان الاخرى
اخليكم مع بعض الصور من الطريق الى كيب تاون وبعدها نكمل
وهذي على مشارف كيب تاون
نرجع لموضوعنا
واحنا ماشين في الخط شوي الا ونشوف الدوريات ماشية من جنبنا وانا كل شوي واطالع في عداد السرعة ما ابغى اتجاوز السرعة ومشينا شوي ونلاقي الطريق واقف والناس صافة سرا سيارة وراء الثانية .... طلع فيه حادث قدامنا شاحنة كبيرة انقلبت وانسد الطريق تماما .. وجلسنا نستنى حوالي نص ساعة بس الغريب انو طوال الفترة هذي السرا كل ماله يطول ولا فيه ولا سيارة تعدت على الثانية واقفين في سرا واحد سيارة ورا الثانية في نظام مستحيل تشوفه عندنا المهم واحنا نستنى شوي وتجينا العسكرية وتقول انو في شاحنة مقفله الطريق واحتمال ما يفتح الا بعد ساعتين وسالتنا وين راحين قلنا كيب تاون ووصفت لنا طريق ثاني نسلكه وفعلا غيرنا وجهة الجي بي اس وانطلقنا وكانت المسافة تفرق بس نص ساعة
وصلنا كيب تاون واول ما وصلنا اتصلت على مسؤول التاجير واتفقنا نتقابل عند بوابة المارينا في الووتر فرونت وفعلا اول ما وصلنا البوابة لقيت واحد واقف واول ما شافني قال mr_iag قلت هوه بزاته
وسوى لنا كرت الدخول واعطانا المفاتيح وطلعنا الشقة وقعنا الاوراق واستلمنا الشقة
وهذي كم صورة من الشقة
وهذا منظر البلكونة
الحين احنا في كيب تاون استلمنا الشقة ووسوينا الشك ان والوقت صار وقت العشاء
بعد ترتيب الاغراض نزلنا تمشينا شوي -مشيا على الاقدام- في المارينا ورحنا للوترفرونت تعشينا وانبسطنا
ورجعنا للغرفة نهاية يوم اخر من ايام جنوب افريقيا
صور من المارينا
صحينا هذا اليوم وكنا مقررين انه يكون يوم بحري اي مخصص للبحر ابتدء من الكامبس بي وحتى رأس الرجاء الصالح
ركبنا سيارتنا وتوجهنا الى الكامبس باي وشاطئها الرملي الجميل لكن الرياح شديدة جدا لدرجة انها تشيل الرمل من قوتها ما قدرنا نجلس وعلى طول قررنا التوجه الى راس الرجاء الصالح ...........( خسارة الموقف) في الكامبس باي من الصعوبة جدا انك تحصل موقف سيارة لدرجة ان الفنادق و السكن هناك يعتبر من مميزات السكن عنده توفر موقف سيارة لكل غرفة .... واحنا ربنا وفقنا وحصلنا موقف قرييييب جدا بس للاسف اضطررنا اننا نمشي
صور من الكامبس باي
وهذي صورة شاطيء ثاني
ياكثر الشواطيء في كيب تاون
تصدقو الحين بس اكتشفت وانا اكتب لكم انو اليوم هذا كان مش ولابد مع اننا حصلنا موقف للسيارة لكن باقي اليوم حظنا كان سيء يمكن استنفذنا حظنا بالكامل في الحصول على الموقف..... يالله ماعلينا اكمل لكم وانتو احكمو بس سبحان الله وانا هناك والى ان بدات اكتب لكم هذه الكلمات ما شعرت ولا حسيت انو اللي صار يعتبر سيء بالعكس كان له طعم اخر غير انه سيء
المهم ركبنا سيارتنا وتوجهنا الى راس الرجاء الصالح واخذنا طريق اعرفه من اول وجميل وومتع جدا نسيت اسمه بس هو عبارة عن عقبة في جبل مطل على المحيط ....الخط متعرج وانفاق والسرعة المسموح بها 40 لكن المنظر ابدااااااااع على يمينك المحيط وعلى يسارك الجبل مكسو تماما بالخضار ........ واحنا متجهين للطريق هذا نتفاجاء بلوحة ان الطريق مغلق للصيانة ..... شفت اللوحة وكملت طريقي قلت حتى يقفل الطريق تماما لكن للأسف مالحقنا نمشي الا وانتهى الطريق ولقينا مكان وقفنا سيارتنا ونزلنا صورنا وتفرجنا شوي واحنا ماشين سالنا الشخص اللي واقف على الطريق من فين نروح لراس الرجاء الصالح من طريق ثاني ..... وصف لنا ووجهنا الجي بي اس وانطلقنا
وهذي بعض الصور من محل ما وقفنا
لاحظو معاي الحين اول شيء الرياح قوية في الكامبس باي ثاني شيء الطريق مقفل لراس الرجاء الصالح ولسى الجاي في الطريق
مشينا متبعين الجي بي اس وماشين في اماكن جديدة اول مره نشوفها وندخل حواري ونطلع خط سريع ونمشي في خط ضيق داخل غابة من الاشجار الكثيفة العملاقة
واحنا ماشين في الخط الضيق تنحرف السيارة عندي شوي بعد الخط الاصفر وكان في حفرة عميقة واكلتها وانا بصراحة متعود على الحفر هنا في جدة بس ماكانت في الحسبان الحفرة هذي وتعدينها شوي ونبداء نسمع صوت غريب في السيارة ............................ اوقف اطالع ويطلع الكفر بنشر
والله وامشي على اقل من مهلي حتى وصلت مكان قدرت اجنب فيه وانزل من السيارة واطلع المثلث واحطه بعيد عشان ما يجي احد يصدمنا
وطاخ طيخ طاخ ......ربع ساعة وانا مغير الكفر ومركب الاستبنا
وهذي صورة الكفر اصغر من الكفر العادي واكثر سرعة توصلها فيه 80 كيلو متر في الساعة حسب ما كتب على الكفر
بيني وبنكم المدام عجبتها فكرة انو اقصى سرعة نوصلها 80 بس انا ..................
بعد ما صلحنا البنشر اشوف الجي بي اس باقي وقت طويل على راس الرجاء الصالح والسرعة لك عليها فكان القرار اننا نكنسل راس الرجاء الصالح مرغمين
هذا رابع شيء بعد الاثنين الاولى ..... ثالثا البنشر ورابعا ما بنروح راس الرجاء الصالح
يعتبر حظ سيء صح ؟؟.................. يمكن قرائتها مجردة كذا بدون ما تكنون عايشين الموقف تعتبروها حظ سيء .............. لكن فعلا ماكان هذا شعورنا ابدا بالعكس كنا مستمتعين بكل شيء ولله الحمد
وما جاء في بالي اننا واجهنا بعض الحظ السيء الا بعد ما بدئت اكتب لكم
بعد قرارنا بالغاء راس الرجاء الصالح قررنا نروح محل بنشر ونصلح الكفر ووجهنا الجي بي اس وانطلقنا
وبعد ما وصلنا للبنشر جاء البنشري يكشف على الكفر وقال هذا الكفر اعطاك عمره .... لازم كفر جديد.... طيب وبكم الكفر الجديد يمكن حوالي 500 ريال وقلت اجل خلينا على الستبنا وهي كلها كم يوم ونسلم السيارة
وهنا الحمد لله اقلكم ان الله وفقنا .....يمكن لوفاكرين في بداية الموضوع لما استلمت السيارة الايجار اول يوم اضطريت اني ادفع قيمة تامين شامل على السيارة وكان حوالي 700 ريال .......والحمد لله غطي البنشر وكمان دقه بسيطة في الصدام الامامي ...... يعني كان ممكن ادفع اكثر من قيمة التامين واتعرض للمسائلة لو ما امنت
خرجنا من البنشر على العصرية ورحنا ندور مطعم هندي ..... المزاج كان هندي وقتها ولا تسالون ليش ..... نكتب في الجي بي اس ونلف ونلف نوصل مطعم بس شكله من برا ما يحمس ونكتب مطعم ثاني ونلف ونلف وثالث ورابع
وفي الاخير قررنا على نانودز .... مطعمنا المفضل .... طلع موجود داخل مول كبيييييير .... وقفنا سيارتنا في المواقف ودخلنا المول بصراحة اول مرة اشوف المول هذا كبير وفخم وهذي صورة من داخل المول وتلاحظون اسم المول مكتوب على السلم الكهربائي
واتجهنا الى الفود كورت ...... ولكن يا للهول .....لا يعقل ........ما بتصدقون ايش لقينا في المطاعم ........
اخيرا لقينا مطعم هندي وحلال ............ وعلى طول طلبنا من عندهم وتغدينا وتمشينا شوي في السوق وكان الوقت قريب المغرب
ركبنا سيارتنا ورجعنا السكن وكان نهاية يوم اخر مليء بالاحداث والمغامرات
وباذن الله في الجزء القادم نكمل معكم اخر الايام من رحلتنا في شهر العسل
ودمتم بود
هذي الصور لجبل الطاولة اثناء تجولنا في كيب تاون اليوم هذا .... صراحة الجبل هذا عجيب غريب ما تمل منه ابدا
يتبع