logo

هوامير البورصة السعودية > الاقسام العامة لموقع هوامير البورصة > الـركـــن الأدبـــــي

شاعر الغليون وDiana!!!!



صفحة 1 من 5
1
2
3
4
5
قديم 07-10-2010, 08:54 PM
  المشاركه #1
وزير بلا وزاره
ابو عبدالله
كاتب مميز
تاريخ التسجيل: Sep 2007
المشاركات: 18,186
 


شاعر الغليون وDiana!!!!

بسم الله الرحمن الرحيم
-------------
في احد الليالي وانا مغترب وعزوبي وطفشان وزعلان لان فريقى المفضل مهزوم بالخمسه وماعندى الا النت اقلب فيه ومثل ماقال الشاعر ((لاضاق صدرى قمت اقلب عرب سات00000))

فتحت النت وتصفحت المنتديات ولافيها شى مثير وفتحت الماسنجر يمكن احصل احد اسولف معه وماحصلت الا لمبة ابو عناد ه وكاتب خمسه وخمسيه وقلت ادق عليه بس بيزيد جروحي وبيضحك عليه هالشايب المتعصب وخصوصا بان فريقه هو الفائز وبيقعد يعلق ويقول خبيلان وزعيبل وخمسه قلت لاداعي نزيد الطين بله الافضل اطلع من المسن قبل يدخل عليه هو وقبل اسكره مادريت الا يوم نقز قدامي على الشاشه Diana hotmil.comتطلب
الاضافه يااااااااااااااااربي بنت وتطلب الاضافه ان مااضفتك من اضيف يامرحبااااااا ويامسهلا مسن
مافيه بنت ماله طعم بس وش اسوى كل ماتعرفت علي وحده يومين اعطتنى اشكل
ومن العجله بغيت ادق رفض بدل قبول
قلت للمسن اى بنت تطلب الاضافه اعمل اضافه لها فوراً
المهم تمت الاضافه وحصلت الحبوبه ديانا وعشان اخذ راحتى اعطيت ابو عناد حضر
مؤقت عشان مايدخل عليه ويخربها
ودقينا علي الغاليه ديانا
شاعر الغليون
ااااااااااااااالو
السلام عليكم
ديانا
وعليكم السلام
من معي
شاعر الغليون
انتى اللتى طلبتى الاضافه
ديانا
اهاااا انت شاعر الغليون اسفه حسبته غيرك
شاعر الغليون
اجل هم واجد
ديانا
وش تقول
شاعر الغليون
اقول ياكثر اصحابك
ديانا
وجع مثلك ماينعطى وجه
شاعر الغليون
اسف ياحبى فهمتى غلط
ديانا
حبك برص وش تقصد اذن
شاعر الغليون
اقصد بانك انسانه اجتماعيه وصديقاتك ومعارفك كثيرون
ديانا
رقع يابو مرقع 0000ماشى
شاعر الغليون
من فين الاخت
ديانا
من ارض الله الواسعه
شاعر الغليون
(((لحظه صمت00بغيت اقول لها وش تبين من اعطاك اميلي بس خفت تنحاش مثل غيرها
يامهبول تجيك بنت الي حد بابك وتطفشها احسن اجاريها وشوف وش عندها ولست بخسران شى)))
ياهلا وياغلا عدد مامشيتى لين جيتى
ديانا
والله مامشيت ولاجيت ولارحت
شاعر الغليون
والله انك حبوبه وعياره
ديانا
ياعجل ماتحبون يالهشباب من كلمتين اصبحنا احباب
شاعر الغليون
وش تبغينى اقول
ديانا
غريبه شاعر واستاذ ومحلل اسهم ولاتجيد الحوار
شاعر الغليون
سلامتك ياحبى بس تعرفين الكلام مع الجنس الاخر يدخله شى من الربكه
ديانا
يعنى مابعد كلمت بنات علي المسن
شاعر الغليون
مالك علي يمين مابعد كلمت بنت لا علي المسن ولا علي الطبيعه ولا حتى في الاحلام
اتحلم علي الصامت
((معظم الشباب يقولون كذا انتى اول وحده اكلمها))
ديانا
وانا مثلك تصدق مامعي في المسن الا انت وبنت خالتى وزميلتى
((بعضهن عندها في المسن 50اميل نصفهم معطيته باند والنصف الاخر مطنشته))
شاعر الغليون
باين عليك بانك بنت ناس وانسانه راقيه وفاهمه
((الكلام هذا للاستهلاك مثل المصلحه العامه))
ديانا
علي فكره نسيت انشدك عن اسمك ياشاعرنا
شاعر الغليون
اسمى لؤى
((كذوب اسمه محماس بس هذا طبع الشباب دائم عند التعارف
يحبون يطلقون علي انفسهم اسماء حلوه تعجب البنات ))
ديانا
عاشت الاسامي واسم حلو مثل راعيه
((قامت تدق علي الوتر الحساس))
شاعر الغليون
ممكن نتعرف علي الاخت
ديانا
سلامتك انا من زميلاتك في منتدى سهم التدبيله
شاعر الغليون
يامرحبا ويامسهلا شرفتينا
هل اتشرف بمعرفة الاسم الكريم
ديانا
غريبه ماتشوف اسمى قدامك والا ماتعرف انجليزى
شاعر الغليون
والله اني اشوفه بس استغربت سعوديه واسمها ديانا
ديانا
اهاااا هذا تفكيركم يالشباب يعنى تسكثرون علينا حتى اسم جميل
مايعجبك للسعوديه الا اسم مزنه وسوير وشيخه
شاعر الغليون
العفو ياحبى
ديانا
ماشى ياحبى
شاعر الغليون
هل من الممكن نتعرف اكثر
ديانا
وش تبى اكثر نشغل المايك والكام كمان
شاعر الغليون
لالالالا لاتفهمنى خطا هذا بعدين
ديانا
هههههه
حلوه بعدين وعامل لك مايك وكام وتقول معرف نسوان
شاعر الغليون
انا قصدى تعريف مبدى قبل نضع النقاط علي الحرووووف
ديانا
يعنى مثل مسرحية شكسبير((ترويض الشرسه))
شاعر الغليون
اسمعي ياحبى مثل ماقلت لك انتى اول وحده اتكلم معها واكيد بيكون هنا سؤ فهم
لاتاخذين الكلام علي موقف الجد
ديانا
عادى خذ راحتك واضح انك انسان مؤدب ومثقف وفاهم وولد ناس
شاعر الغليون
اشكرك علي مشاعرك وهذا من ذوقك
ديانا
كم عمرك
شاعر الغليون
26سنه وانتى كم عمرك
ديانا
عمرى سر من الاسرار ومش مهم لانه يقدم ولايؤخر
شاعر الغليون
صحيح لايقدم ولايؤخر بس العمر له دور لفهم عقلية الطرف الاخر
ديانا
الاعمار متقاربه بيننا والعلقيات واحده تقريبا حسب مايتضح لي من طرحك ردودك في المنتدى
شاعر الغليون
وش اسم معرفك في المنتدى
ديانا
ياخبل لقيت بنت تقول لشاب معرفي في المنتدى كذا عشان يفضحها
شاعر الغليون
اسف كمان فهمتينى خطا بس قصدى اشوف مواضيعك وردودك فقط
ديانا
ماشى بس من يعجبك في المنتدى بصراحه
شاعر الغليون
من تقصدين رجال او نساء
ديانا
الرجال طبعا لان النساء بيعجبنك مايحتاج سؤال
شاعر الغليون
والله كل الزملاء فيهم خير وبركه بس يعجبنى ابو راس والملقوف
ديانا
هههههههه
ان الطيور علي اشكالها تقع
شاعر الغليون
وانتى من يعجبك بصراحه
ديانا
ملزم علي ذلك بجد
شاعر الغليون
طبعا عشان نعرف تفكيرك
ديانا
يعنى لازم اقوله عشان تعرف تفكيرى
شاعر الغليون
ايو الله ودى اعرفه عشان اعرف تفكيرك مادام عرفتى تفكيرى
ديانا
والله الاعجاب يختلف حسب نوعية الطرح
هناك اعجاب بمحلل وهناك اعجاب بكاتب
وهناك اعجاب بشاعر00
شاعر الغليون
نريد من يعجبك من المحلليين والكتاب
ديانا
بكره اقول ياحبى امي جت وبسكر النت
باااااااااااااااااااى
شاعر الغليون
فين رايحه الليله ليلة خميس ونريد نسمر ونستانس
ديانا
ودى والله بس امي جت وخواتي بيجن اشوفك بكره الساعه10مساء
بااااااااااااااااااى
شاعر الغليون
الساعه10مساء بعيده ماتقدرين في الصباح او الظهر
ديانا
مستعجل علي رزقك ليش ولقيت احد يجلس في الصباح اوالظهر علي المسن
الناس نايمه ماتقوم الا العصر او المغرب
باااااااااااااااااى
شاعر الغليون
بااااااى بس لاتنسين شاعر الغليون وDiana!!!!
وقمت اردد ((راحت علي الباب الايمن فوق مكسيما00والشاص عيا حلال القوم يلحقها))شاعر الغليون وDiana!!!!
وبغيت انام ماجاني النوم الف علامة استفهام تدور في راسى وبغيت اتصفح المنتديات
مالي نفس قمت بغيت افتح المسن وارفع الحضر عن ابو عناد واعلمه بما حصل واشوف وش رايه
بس قلت بيقعد يتفلسف عليه ويقول يامهبول قل كذا ويامهبول قل كذا وبيخرب كل شى والا بيقول
هات اميلها ونشوف وش عندها وهذا مصدر خوفي بيسرقها منى المهم قمت اردد بيت خلف الذى يقول
البارح الليل ماغمضت به كله00000اراقب الصبح جاهز وتحراله
غلبنى النوم والنوم سلطان

والي اللقاء القابله ان شاء الله في الحلقه الثانيه
الموضوع الأصلي : اضغط هنا    ||   المصدر :

الـركـــن الأدبـــــي
 
  
قديم 07-10-2010, 09:36 PM
  المشاركه #2
sam999
عضو هوامير المميز
تاريخ التسجيل: Mar 2007
المشاركات: 337
 



روح اسمع اغنية :

سهران لوحدي :5:

لأم كلثوم






قديم 08-10-2010, 01:30 AM
  المشاركه #3
ضمى المشاعر
ابو مشعل
كاتب قدير
تاريخ التسجيل: Apr 2007
المشاركات: 6,040
 



اهلاً بك اخي الكريم

ما زلت تتخذ طريقاً وعراً
لا يسلكه الا ,,,المميزون
استمر,,,,فسوف اتابعك



قديم 08-10-2010, 08:29 AM
  المشاركه #4
خالد ابو يزيد
كاتب قدير
تاريخ التسجيل: Aug 2005
المشاركات: 16,752
 



ننتظرك يامبدع



قديم 08-10-2010, 09:29 AM
  المشاركه #5
أمل الكون
عضو موقوف
تاريخ التسجيل: Feb 2010
المشاركات: 10,374
 



عسى ماتطلع ديانا بالأخير أبو عناد :8:

بانتظارك ياوزير



قديم 08-10-2010, 01:48 PM
  المشاركه #6
مسآهمة
كاتبه مميزه
تاريخ التسجيل: Mar 2010
المشاركات: 4,403
 



أسلوبك مشّوق في السرد كآتبنآ المتميّز

بـ انتظآر التتمّة بـ شغف




قديم 08-10-2010, 08:53 PM
  المشاركه #7
حرب تاج رأسي
قلم هوامير المميز
مؤسسة مسابقة الملتقى
تاريخ التسجيل: Jun 2007
المشاركات: 11,735
 



يااخي انت تحفه
اكمل اكمل وش صار



قديم 09-10-2010, 12:20 AM
  المشاركه #8
وزير بلا وزاره
ابو عبدالله
كاتب مميز
تاريخ التسجيل: Sep 2007
المشاركات: 18,186
 



الحلقه الثانيه
------------------------

غطنى النوم ولاقمت الا الساعه11صباحاً وقبل اسوى فطورى
شغلت النت وفتحت المسن قلت لعل وعسى يمكنها تمر من هنا والا من
هنا يمكنها تشعر بمانشعر به المهم افطرت امام النت مغير ابحلق عيوني
وكل ماسجل احد دوخل صابتنى رعشه اتصلو عليه اصدقائى وقالو الغداء جاهز
اعتذرت منهم وزهمت علي المطعم المجاور يجيب غداى وقمت اتصفح
المنتديات ولااعرف وش اقراء بعد الغداء قلت اكيد انها قامت من النوم الان
ويمكن تمر علي المسن ومسكت خفاره المهم راح الوقت الظهر والعصر وجاء المغرب وانا احسب الساعات والدقايق
بعد المغرب اتصلو عليه الاصدقاء يقولون الليله معزومين علي عشاء اعتذرت
منهم استغربو ذلك دائما وخصوصا في الخميس والجمعه اول من يحضر
للاستراحه انا واخر من يطلع منها انا بصفتى عزوبي وخصوصا اني
اعتذرت عن الغداء كذلك اتصل عليه واحد من الاصدقاء وهو عيار وقال
مااعتذرت عن الغداء والعشاء الا انت ((صايد لك صيده)) ضحكت منه وقلت
ظروف بعد ماسكرت الجوال قلت يهبا هو يقراء الافكار والا يعرف شى
المهم راح الوقت جت الساعه9 قمت احسب الثواني والافكار تدور في راسى هي بتجي ام لا
وكل الاحتمالات اللتى من الصعوبه شرحها ويمكن البعض منكم مرت عليه
مثل هذى الامور وكل مااقتربت الوقت اعتراني شعور غريب مااستطيع
اعبر عنه رهبه ورغبه دقت ساعة الصفر 10مساء واصبحت في مهب
الريح مثل حارس المرمي عند تنفيذ ضربات الترجيح هل يوفق ام لا
لينها يوم سجلت دخول دق قلبى دقه احسبه يفجر الضلوع ولا اراديا ارسلت
عليها
شاعر الغليون
سألنا عنك يالمحبوب وينك000ترى المحبوب تفقده الحبايب
ديانا
السلام عليكم
ايش محبوب وحبايب وش فيك يارجال طرت في العجه
شاعر الغليون
هذى المشاعر مانقدر نتحكم فيها
ديانا
كيفك البارح نمت كويس او جتك كوابيس
شاعر الغليون
((لحظه تشكلت علامة استفهام وقلت وش تقصد من ذلك وش يدريها عن ماحصل لي المهم قلت مادام جت نكمل السالفه ونشوف ))
اقولك الصراحه انك اشغلتى تفكيرى مانمت زين
ديانا
هههههههههههههههههه
غريبه هم انتم مهفات يالشباب اى كلمه من بنت ماشفتها ولاعرفتها بتعيشون
مثل هذى الافكار
شاعر الغليون
كل شى جديد له رهبته يابنت الحلال مانعرف النسوان الا باسمائهن في الصحف
والمنتديات ولاصدقنا احد يعطينا وجه:4:
ديانا
والله انك حبوب وعلومك زينه
شاعر الغليون
شكراً علي الجرعه معنويه
ديانا
اقولك ماودك نرجع لموضوعنا
شاعر الغليون
وشهو موضوعنا
ديانا
الحكايه اللتى توقفنا عندها البارح
شاعر الغليون
توقفنا فين
ديانا
الله يخلف نسيت عشاك البارح :4: توقفنا من يعجبنى في المنتدى
شاعر الغليون
ايوه صح بس لاتشرهين عليه من فرحتى برجوعك نسيت حتى عشاى الليله:5:
ديانا
هههههههههههههههههه
كلامك صحيح والا مزحه تراك رجل عاقل واستاذ غريبه كيف تكون مشاعرك
مثل مشاعر المراهقين
شاعر الغليون
يابنت الحلال لاتشرهين الرجال سوى كبار والا صغار مراهقين والا عاقلين
مع النسوان تروح العقول
ديانا
ههههههههههههههههه
شاعر الغليون
طيب من يعجبك في المنتدى من المحلليين والكتاب
ديانا
تريد الصراحه والا اختها
شاعر الغليون
طبعا اريد الصراحه
ديانا
الصراحه لست ممن يعجبوني كثيراً واسف ان قلت الحقيقه
شاعر الغليون
هههههههههههههههه
يابنت الحلال انا عارف ذلك وماعجب الا امي :4:بس
ديانا
الاعتراف سيد الادله الحمدالله انك انسان واقعي وتعرف نفسك
بس ترى فيك مميزات ايجابيه
شاعر الغليون
وشهى هالمميزات
ديانا
بعدين اقولك مهوب وقتها
شاعر الغليون
خلاص الان علمينا من يعجبك في المنتدى
ديانا
صراحه يعجبنى الزعيم ابو هيثم رجل جاد وصادق ودقيق وافضل المحلليين حسب متابعتى له
لانه اقلهم اخطا في التحليل وطرحه وردوده تدل علي انه شخص ملتزم ودقيق وصادق وعملي ومثل هذى الشخصيه
يعجب النساء بس مايحبن يتزوجنه
شاعر الغليون
غريبه يعجبهن ولايحبن يتزوجنه كيف يحصل ذلك
ديانا
مافيه شى غريب الاعجاب بالشخصيه غير والرغبه بالارتباط بها غير
الزعيم انسان جاد ومرتب ودقيق وعملي ويعطى كل شى حقه
بالملي وقت للعمل وقت للبيت ووقت للزوجه ووقت للراحه
والمرأه تحب الرجل الرومانسى العاطفي المندفع في حبها ويضحي
بكل شى مهما كان في سبيل ارضائها ويغدقها بعبارات الحب
والدلال بعكس الانسان الجاد الذى يعاملها بطريقه روتونيه رتيبه
شاعر الغليون
منك نستفيد ولو اني غير مقتنع كثيراً
ديانا
بسيط ياحبى اقرب لك المعنى اكثر
شوف انت ومثلا والشباب في مثل عمرك اليس تعجبكم الممثله الفلانيه
والرقاصه الفلانيه لمميزات فيها بس ماتحبون الارتباط بها تحبون الارتباط
بالمرأه الستير اللتى ترضى زوجها وتربي اولادها
اليس كذلك
شاعر الغليون
ايوه فهمت الان
ديانا
الحمدالله انك فهمت
شاعر الغليون
ومن يعجبك من الكتاب
ديانا
ومن غيره صاحبك الشايب ابو عناد
شاعر الغليون
وش ادراك انه صاحبى
ديانا
والله غريبه ماتشوف الردود بينكم في المنتدى كيف العلاقه بينكم
وثانيا هو صاحب الجميع في المنتدى
شاعر الغليون
انتى تقرين قصص ابو عناد الله يخلف عليك
ديانا
ليش وش في قصصه حرام
شاعر الغليون
لا مهيب حرام بس ماتصلح للبنات
ديانا
اقولك انثبر بتعلمنا اللي يصلح والا مايصلح اجل فيه قصص للبنات
وفيه قصص للاطفال ياشاطر
شاعر الغليون
لالالالالالالالا لاتفهمنى خطا
بس بعض قصصه تتجاوز الخطوط الحمراء وماتصلح للبنات
ديانا
اقولك فاهمتك مثل امك لاتخاف وقاريه افكارك ونعرف اللي يصلح واللي مايصلح
شاعر الغليون
خلاص ياحبى مشيها لي زعلتى وكلامي عن غير قصد
ديانا
ولايهمك ياحبى ترى لك معزه عندى ومحبه من نوع اخر؟؟؟؟
والان استاذن كان بودى اقضى الليله معك علي المسن بس
زميلاتي بيحضرن الان وبكره الساعه 10حسب الموعد ان شاء الله
شاعر الغليون
لالالالالالالالالالا بدرى بدرى يابنت الحلال جالس انتظرك 24ساعه
وتجلسين ساعه وتروحين
ديانا
ههههههههههههههههه
خلك ثقيل تعبد الناس يوم عبدو الحجر يوم انه ثقيل
اثقل شوى وابشر الزمن طويل معنا ومالم نقوله الليله بنقوله بكره وبعدها وبعدها
شاعر الغليون
والله عندى كلام كثير بقوله بس خربتي علينا السهره
ديانا
ماخرب شى ازبط كلامك ورتبه واكتبه في ورقه:4:عشان ماتنساه اذا جيت
على المسن:5:
شاعر الغليون
لي طلب بسيط ممكن تحققينه
ديانا
لالالالالالالالالالا بكره بكره باااااااااااااااى
وسكرت المسن
قمت اضرب كف بكف وزادت حيرتي وتشتت افكارى
وقمت للمطبخ اشوف لي شى اكله وارتب افكارى
وقمت اردد
ولاواهنيك ياقمر تكشف الغرات000تبين على بعض المخاليق وتشوفه
تشوف الخدود اللي تبارق كما اللمبات000وعنها البراقع تالي الليل مكشوفه
وتشوف النهود اللي بدمث النحر غضات00
واشقر يقضه بين جوفه وسرجوفه

والي اللقاء القابله في الحلقه الثالثه ان شاء الله



قديم 09-10-2010, 01:44 AM
  المشاركه #9
أمل الكون
عضو موقوف
تاريخ التسجيل: Feb 2010
المشاركات: 10,374
 



بسرعه ياوزير لاتسحب فينا :12:

ودي أعرف اش الطلب :5::8:



قديم 09-10-2010, 09:06 AM
  المشاركه #10
ابو فيروز
كاتب قدير
تاريخ التسجيل: Jul 2008
المشاركات: 10,786
 



اقتباس:
المشاركة الأصلية كتبت بواسطة أمل الكون
بسرعه ياوزير لاتسحب فينا :12:

ودي أعرف اش الطلب :5::8:

بطاقة شحن ياأمل ههههههههه

بسرعه ياوزير كمل ويش الطلب متابعين للحوار :5:

يالله فيلم اكشن واثاره




قديم 09-10-2010, 09:29 AM
  المشاركه #11
أمل الكون
عضو موقوف
تاريخ التسجيل: Feb 2010
المشاركات: 10,374
 



اقتباس:
المشاركة الأصلية كتبت بواسطة ابو فيروز
بطاقة شحن ياأمل ههههههههه


بسرعه ياوزير كمل ويش الطلب متابعين للحوار :5:


يالله فيلم اكشن واثاره
هههههههههههه لا هو اللي طلب مش هي

اتوقع يبي الرقم < براااا



قديم 09-10-2010, 09:34 AM
  المشاركه #12
ابو فيروز
كاتب قدير
تاريخ التسجيل: Jul 2008
المشاركات: 10,786
 



اقتباس:
المشاركة الأصلية كتبت بواسطة أمل الكون
هههههههههههه لا هو اللي طلب مش هي

اتوقع يبي الرقم < براااا

طيب الحين الاوضاع انقلبت :5:

الحين حواء تصرف على آآدم :5:




صفحة 1 من 5
1
2
3
4
5



الكلمات الدلالية (Tags)

وdiana

,

الغليون

,

شاعر


«

مما تدفق من المحبرة وحفظته الذاكره

 |

القمر الأحمر

 »
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code is متاحة
كود [IMG] متاحة
كود HTML معطلة
الانتقال السريع

هوامير البورصة السعودية - الأرشيف - الأعلى


11:49 PM

images

Powered by vBulletin® Version 3.8.11
Copyright ©2000 - 2024, vBulletin Solutions, Inc.

جميع المواضيع و الردود المطروحة لا تعبر عن رأي الموقع بل تعبر عن رأي كاتبها وقرار البيع والشراء مسؤليتك وحدك بناء على نظام السوق المالية بالمرسوم الملكي م/30 وتاريخ 2/6/1424هـ ولوائحه التنفيذية الصادرة من مجلس هيئة السوق المالية: تعلن الهيئة للعموم بانه لا يجوز جمع الاموال بهدف استثمارها في اي من اعمال الاوراق المالية بما في ذلك ادارة محافظ الاستثمار او الترويج لاوراق مالية كالاسهم او الاستتشارات المالية او اصدار التوصيات المتعلقة بسوق المال أو بالاوراق المالية إلا بعد الحصول على ترخيص من هيئة السوق المالية.