وش علاج الدمل الذي يخرج بفتحة الشرج؟

المشاركة الأصلية كتبت بواسطة غازي2004

شوف ياطيب
حالتك والله اعلم قريبه من حاله مريت بها
بدايه حبه صغيره طلعت بذاك المكان وكنت وقتها اسوي
رياضه مشي وقلت يمكن من المشي ووقفت الرياضه
وشوي شوي زاد حجمها وصار لها الم 0 وسويت دكتور
واروح للصيدليه واخذ مضاد حيوي اسمه اوجمنتين
وصار الدمل يصغر ويخف المه واذا وقفت المضاد
رجع لحالته وازود 0 المهم ماخليت شي ماجربته
من كريمات ومضادات ومافي فايده
ويشور علي واحد من الاصحاب الله يسامحه
ويقول عليك بمويه البحر روح تسدح فيه كم ساعه
وتشوف خير0 وانقز للبحر واروح اتسدح واتبطح فيه
من بعد صلاة العصر للمغرب ويوم خرجت من البحر
الا وانا اتفاشق والالم شي ماينطاق وارجع للبيت
واتحمل الين الساعه ثلاثه الفجر وبعدها ماعاد فيني
قدره على تحمل الالم واسري لمستشفى بخش بالطواريئ
ومن شافها قال هذا خراج ( دمل ) لابد نشيله بعمليه جراحيه
وتحت التخدير الكامل 0 قلت سو الي تبونه بس ارتاح
وسويتها وشالو الدمل واعطوني علاج ومتابعه لمدة شهر
وبعد شهر رجع الدمل والالم نفسه وارجع للدكتور ويقول
لي اسف شكله ناصور تحته 0 واقوم اتهاوش معه
طيب يوم شلت الدمل ليش ماشلت الناصور؟؟
والله قال لي الاتفاق كان على جراحة استئصال الخراج ( الدمل )
طلع نصاب او مايدري وكلهم اخس من بعض
المهم تهاوشت معهم ومن عندي على مستشفى الاطباء المتحدون
دكتور نصحوني فيه اسمه حسن نصر متخصص في كل جراحات
هذيك المنطقه0 ومن كشف علي وقال هذا ناصور وماله حل
الا عمليه قلت له توكل على الله 0 متى ؟ قال بكره وهالحين روح
سوي تحليل دم وتخطيط للقلب وتعال صلاة الفجر وانت صائم
المهم جيت وسويت العمليه ويوم فقت من البنج على العصر
الا وهو عندي 0 ويقول انت فين عايش يازول
قلت خير ؟ لايكون شي خطير ورحت اتراعد
قال لي لا الحمد لله انت كان عندك بواسير متضخمه واصله لنص المستقيم
وهذا الناصور طالع وفاتح طريق جديد
المهم الراجل طلع مقولات عامه 0 شال كل شي
البواسير والناسور والدمل 0 والحمد لله
هالكلام من سنتين

زبدة الكلام
شف لك جراح متخصص وحاول تعرف وش سبب الدمل
لانه لو كان تحته ناصور 0كل ماتعالجه راح يرجع من جديد
والموضوع تراه بسيط بس يبيله عزم وصحتك اهم من السوق
والله يشفيك ويشفى مرضى المسلمين