هوامير البورصة السعودية

لو المناوي تجي بالكيف
أشري الفين قرقوره

ووايت وغرفه بها تكييف
شغل الحفر حيل محكوره

وأبيع منها لجانا الصيف
واخذلي فلـه وفرفوره

سوريتن من بنات الريف
فطورها دوم بندوره

|.. عايد الشملآني

لو المناوي بكيف منيف
تسعين ناقه ومقهوره

ومربعات شمال طريف
بأرضن قفر تو ممطوره

راع الغنم حولها ماشيف
بس القطا حط منقوره

وحوارهن قيمته لجنيف
نقضي الصيف وشهوره

بس المناوي مهي بالكيف
وشلون والرجل مكسوره ؟

.. منيف الصقري

إخيالكم ياهل التوصيف
ماهي على الكيف محكوره

والكيف والله ياراع الكيف
ماهو بضانن ولا مُوره

ولا بشوف البهم بالريف
ولا هكا الصفر مقهوره

ولا صار مانت ترى حريف
لاتبلّش الناس بالكوره

الكيف لادبر لهيب الصيف
والطير قرنس على دوره

والجيب كامل على التوصيف
لاندٍ على كيف دكتُوره

وعزبه نشامى مهي تصفيف
وكلٍ بذل فوق مقدوره

مكمّله ماعليها حيف
وهذا هو البال وسروره

قنص وركاده وعرف وكيف
رجال بالعرف مخبوره

هدو وصادو وهذا الكيف
والطير ارخوا له سيوره

بوسميّه مالفها ضيف
متخالط العشب وزهوره

يعجبك نبت اليهق لاشيف
كاسي هكاالفرع ومقوره

وقليقلانه قفر ماحيف
نابت على الحزم وظهوره

وهذي ترى منوتي يامنيف
والرأي من بيننا شوره

.. محمد الدهمشي

راع الغنم مايطب جنيف
مابين ( ثولا ) و ( مطيوره )

لو المناوي تجي بالكيف
اصير انا مثل اخو نوره

اللي حكمها بحد السيف
وخلى البعارين مقهوره

من شرقها لين تعدى طريف
ومن غربها لراس تنوره

لو عنده ددسن يحكم جنيف
والصين يرقى على سوره

والهرج منوه ماهو توصيف
متقاعدن والحال مستوره

|.. ابو سامي

شاركتكم من ربوع طريف
على النقا نكتب سطوره

ماقول في هالزمن ياحيف
سادو على الفن والكوره

حمادنا لو يجي به ريف
ممنوع ناصل زهوره

ينبت ويحمس بوجه الصيف
ماذاقته كل قرقوره

مابلخلا صيد ياحرّيف
مار اطلقه واقطع سبوره

والوضع هذا يبي تصنيف
شف العدو طالت شبوره

يضرس علينا بحد السيف
تجهزو قرب حضـوره ..

.. خالد منسي الرويلي

امانيكم سحابه صيف
تمطر على قاع مستوره

لا بالوسم مطركم شيف
وأرضه من الملح مغموره

لو بالاماني يطيب الكيف
مايطيب لي غير بماموره

يوم ابو متعب يحد السيف
وصوب الهدف يرمي الكوره

على الجحش بلاها جنيف
نحرر الشام من جوره

.. بدر مونس الشراري