هوامير البورصة السعودية - ياليل لندن كل ماهب نسناس

ياليل لندن كل ماهب نسناس
بشويش عانق مترف العود ياليل
عوايده لابرّد الليل يحتاس
يثّر على صدره ويشكي البهاذيل
وان هل رذراذ السحايب فلاباس
بينه وبين الغيم عشق وتعاليل
بلطف داعب وجنة الزين واحساس
بلّل جبينه وقبّل الكف تقبيل
قل للشوارع تحتفل به وللناس
لقمراك ونجومك وضي القناديل
وللباكنقهام يفز ويقرع بالاجراس
ترحيب بقدومه تحية وتبجيل
يابرج لندن انثر ورود والماس
واعزف على فرحة وصوله مواويل
وعلى ضفاف التايمز لو بالقدم داس
استبشرت اكسفورد وريدنق وكمبيل
ويابولس القدّيس قم سو قدّاس
وعن سبعة الأسرار هات التفاصيل
قدّم قرابينك واكليلك والاعراس
ومع زيت ميرونك صليبٍ وقنديل
رتّل على عذب السجايا والانفاس
اصدق تراتيل الكنيسة والانجيل
خبّر عديل الروح مدقوق الالعاس
من غيبته سود الليالي بها ميل
الشوق طاغي واشغل القلب هوجاس
واستوحشت روح المعنّى غرابيل
نجل العيون وخادر أجفان نعّاس
عنود صيد ماله مع الناس تمثيل
واذا ذكروا بالزين طنجه ومكناس
وشيراز مع كشمير جمله وتفصيل
بالوصف فايق على كل الاجناس
شعاع شمسٍ شق صدر المخاييل
يالله يامنجي نبيّه من الباس
يامنزّل وحيه على الخلق تنزيل
تحميه من سوّ الليالي والاتعاس
وتقرّ برجوعه عيوني بتعجيل

عساه تعجبكم وسلامتكم