هوامير البورصة السعودية

هوامير البورصة السعودية (https://hawamer.com/vb/index.php)
-   ساحات الهوامير المفتوحة (https://hawamer.com/vb/f23/)
-   -   يالربع شاوروني قبل ارتكب جريمة .. والقانون هو السبب!! (https://hawamer.com/vb/hawamer2333576)

iMajed2030 12-10-2019 03:29 PM

يالربع شاوروني قبل ارتكب جريمة .. والقانون هو السبب!!
 
السلام عليكم

بادخل لكم في الموضوع .. أنا رجال شاركت اثنين من خوياي ودخلنا بمشروع تجاري
وبعد افتتاح المشروع بسنة عرضوا علي يشترون حصتي وتم الاتفاق على أن أبيعهم إياها وأستلم ربع المبلغ عند التوقيع والباقي أقساط على سنة
انتهت سنة وسنتين ولاسددوا ريال .. ولامنهم اللي كلمني وحتى اعتذر .. وعمري والله مارفعت جوالي ودقيت عليهم عشان أطالب بالفلوس

المهم وصلنا المحكمة وبعد سنة صدر لي حكم ضدهم بإلزامهم بالسداد .. وتم تحويلي على محكمة التنفيذ اللي وقفت خدماتهم بعد حوالي شهرين!!
إيقاف الخدمات يشمل فقط التعاملات التجارية والمرور والجوازات .. يعني المنع من النشاط التجاري وعدم الاستفادة من خدمات المرور بالإضافة للمنع من السفر
وأصلا من يوم شكيتهم بالمحكمة نقلوا تراخيصهم التجارية وسياراتهم بأسماء زوجاتهم وأولادهم !

وحكمي بدرج سيارتي قلب لونه من الشمس ومن طول المدة على الفاضي .. والمشكلة أنني تسلفت وبعت سيارتي وحتى ذهب زوجتي عشان أعالج الوالد وعشان شرائي لبيت من وزارة الإسكان وألزموني بدفعة 10% من قيمة العقار!!
الآن وصلت مرحلة سيئة جدا وبدأت تظهر على أسرتي ملامح التغيير بمستوى المعيشة اللي كنا نعيشه قبل لاياكل علينا القرض العقاري نص الراتب !! وأقسم بالله أن الوالدة تنتظر من شهرين أجمع لها 4000 ريال عشان أسوي لها عملية بعيونها !!


اللي أطالبهم راتب أقل واحد فيهم 35000 .. وظروفهم ماشاء الله ممتازة .. وقاعدين يأسسون الان لمدرسة أهليه واشتروا بيوت كاش !! ولافكروا يسددون لو ألف ريال من دين يتجاوز 400 ألف !! .. لأنه مافيه شي يجبرهم والدعوة سهالات !!
أشيل أوراق الحكم وأروح للشرطة لعل وعسى يساعدوني باسترجاع حقي يقولون مانحبسهم .. جب لنا أمر حبس من المحكمة !!! مع أن الحكم مكتوب فيه ( ينفذ بالقوة الجبرية ويجب على كل مؤسسات الدولة تنفيذ مافيه ) !!
ترددت عليهم أكثر من مرة حتى أشفق علي عسكري بالقسم وقال دور لك واسطة بالبحث الجنائي حق الشرطة .. حتى لو جندي حاف يقدر يمسيهم بالسجن الليلة !!
لكن للأسف ماعرف أحد هناك .

أشيل تقارير أمي وأبوي وأصور أوراق القرض وكمبيالات الديون اللي على راسي واتوجه لقاضي التنفيذ وماقصر أحد الزملاء جاب لي شاهد من مكتب العقار على شرائهم لمنازلهم كاش قبل كم شهر .. وفرشت كل أوراقي وتقاريري على مكتب الشيخ وقلت له حرفيا : أسرتي بتضيع وشيباني بيتدهورون صحيا وأنا علي كمبيالات وديون والجماعة ذولا مالهم نية يعطوني ولو جزء بسيط من حقي ... تكفى ياشيخ أبي أمر حبس !!!!
أقسم بالله ياجماعة مارفع حتى عيونه عن الكمبيوتر وعطاني الإجابة وهو مقفي : مانعطيك أمر حبس إلا إذا كان دينك مليون فأكثر!!!!!
ياشيخ الله يحفظك صار حجم المبلغ أهم من ضياع أسرة كاملة !! أرجوك عطني على الأقل أمر حبس لواحد منهم .. أهم شي يشوفون أن فيه إجراء قاعد يتنفذ ضدهم ويعرفون أن فيه قانون لازم يتنفذ !!

رفض نهائيا يعطيني أمر بالحبس وقال لي وراك مراجعين .. فأخذت أورقي وطلعت !!!

وعلى هالحال سنة ورى الثانية ياجماعة الخير .. حتى خرجت من الفيلا اللي شريتها وأجرتها عشان تساعدني شوي .. واستاجرت أنا والأهل بملحق شقة بالسطح .. وبعنا السيارة العائلية ورجعنا على إكسنت كانت إيجار!!!

ليش كذا .. بالله عليكم هل هذا هو العدل وأمر الشرع !! القانون نفسه يدفعك لارتكاب مالاتحمد عقباه وأنت تشوف حقك بعينك ولاتقدر تاخذه !!!

العدل البطيء ظلم .. العدل البطيء ظلم !!

الجنوبي أحمد 12-10-2019 03:34 PM

رد: يالربع شاوروني قبل ارتكب جريمة .. والقانون هو السبب!!
 
دام عندهم ايقاف خدمات فمصيرهم يحتاجون الخدمات الحكومية تجديد بطاقة او جواز او استمارة سيارة او غيرها
ان شاء الله حقك يرجع لك

Cue 12-10-2019 03:35 PM

رد: يالربع شاوروني قبل ارتكب جريمة .. والقانون هو السبب!!
 
أشكهم لرب العالمين في جوف الليل ان كنت مظلوم وقل: ربي اني مسني الضر وأنت أرحم الراحمين


فساهم جوف الليل لاتخطي أبدا اذا كنت مظلوم فعلا

S T O C K S 12-10-2019 03:38 PM

رد: يالربع شاوروني قبل ارتكب جريمة .. والقانون هو السبب!!
 
الطيبة ما لها مكان في هالزمن

الله يعينك وييسر أمرك وبإذن الله تجد اجابات كافية ووافية

موحد لله 12-10-2019 03:39 PM

رد: يالربع شاوروني قبل ارتكب جريمة .. والقانون هو السبب!!
 
حقك ثابت وراح يرجعلك إن شاء الله بس المهم لا تغلط
حاول تحرجهم فقط كلم ابائهم اعمامهم شرف عليهم جماعتهم
روح لهم في مناسبه خاصة وشرف جماعتهم المهم لا تغلط وتحط نفسك بمحل ادانه

شرف البقاء 12-10-2019 03:40 PM

رد: يالربع شاوروني قبل ارتكب جريمة .. والقانون هو السبب!!
 
سلطة القضاء التنفيذيه من الجهات الحكومية عندنا بالبلد ضعيفة وسيئة جدا. حقك ماتاخذه. تبطي عظم وانت تترجى.
الشكوى لله. مالك الا الدعاء والصبر.

f15sa 12-10-2019 03:40 PM

رد: يالربع شاوروني قبل ارتكب جريمة .. والقانون هو السبب!!
 
حسبك الله عليهم ونعم الوكيل تبغى أفضل حل خذ اوراقك وعلى الأمارة وبإذن الله تتيسر أمورك وإذا انت بالشرقية ترى الأمير يقابل المواطنين كل يوم أثنين جهز معروضك وأدخل عليه.

مقرش الرويلي 12-10-2019 03:42 PM

رد: يالربع شاوروني قبل ارتكب جريمة .. والقانون هو السبب!!
 
امسك الشيبان ورح للاماره وامر التنفيذمعك وقل

ابي حقي اللي راح وعلمه بالسالفه وان شاءالله تنفرج

ابومـطيران 12-10-2019 03:42 PM

رد: يالربع شاوروني قبل ارتكب جريمة .. والقانون هو السبب!!
 
اقتباس:

المشاركة الأصلية كتبت بواسطة الجنوبي أحمد (المشاركة 40079413)
دام عندهم ايقاف خدمات فمصيرهم يحتاجون الخدمات الحكومية تجديد بطاقة او جواز او استمارة سيارة او غيرها
ان شاء الله حقك يرجع لك

الرجال يقولك نقلو كل شي باسامي زوجاتهم يعني مايحتاج يسوي شي
ولو يبي يسافر يدفع كم ريال على جواز اوروبي او افريقي وهو قاعد في ديرته و يطلع جوازه ويجيه بريد و يسافر

ماتضررو من قرارات المحكمه

نور الجزيره 12-10-2019 03:43 PM

رد: يالربع شاوروني قبل ارتكب جريمة .. والقانون هو السبب!!
 
ارفعها للاماره والله ماالومك بس اصبر الصبر مر ولكن ان شالله تتيسر امورك ...


11:11 AM

Powered by vBulletin® Version 3.8.11
Copyright ©2000 - 2020, vBulletin Solutions, Inc.

جميع المواضيع و الردود المطروحة لا تعبر عن رأي المنتدى بل تعبر عن رأي كاتبها وقرار البيع والشراء مسؤليتك وحدك