هوامير البورصة السعودية

هوامير البورصة السعودية (https://hawamer.com/vb/index.php)
-   ساحات الهوامير المفتوحة (https://hawamer.com/vb/f23/)
-   -   مزايدات موقع حراج #خدعة (https://hawamer.com/vb/hawamer2450455)

أنا السعودي 20-08-2020 04:04 AM

مزايدات موقع حراج #خدعة
 
لي تجربة مع موقع حراج
كنت محتاج شاشة كبيرة
والاقي واحد منزل اعلان شاشة ٦٥ بوصة بكرتونها ومصور الفاتورة بـ ١٦٥٠ ريال
واطالع الاقي واحد فقط سايمها بـ ٩٠٠ من ٨ ساعات

زدتها ٥٠ ريال الا شوي طالع واحد وصلها ١٠٠٠ وحاط جواله

شوي ازود ٥٠ يطلع لي واحد ثاني وثالث ورابع لين وصلتها ١٤٠٠ ريال الا واحد جديد يزود ١٤٥٠ ريال

واقولبها في راسي قلت الفرق بيصير ١٠٠ ريال وما ادري عن التخزين وبيأخرني في التسليم ووووو

تدري هونت ورحت للسوق ووالله اني لقيت نفس الشاشة بنفس المواصفات بـ ١١٠٠ ريال فقط

بمعنى إني كنت بأدفع زود ٣٠٠ ريال على شاشة ما عاينتها قبل الشراء

المهم إني تركت السالفة إلا إنه قبل شهر اطالع الا الاقي واحد حاط اعلان شاشة نفس الاعلان ونفس الصور واشوف الا مسيومة بـ ٩٠٠ شوي الا واحد يبدأ يزايد وأشوف نفس السيناريو كم واحد يدخل يزايد والضحية اللي كنت مكانه هو الوحيد اللي صامل والبقية يزود ويختفي لين للاسف وصلها ١٤٥٠ ريال والله اعلم تدبس فيها.


اليوم أشوف واحد معلن عن ساعة هواوي مستعملة سعرها الرسمي ٧٧٠ ريال

واطالع اول واحد سايمها بـ ٢٠٠ واشوف اخر سومة ٦٠٠

حدث العاقل بما يعقل اللي سامها ٦٠٠ عجزان يشتري جديدة بفرق ١٧٠ ريال!


الخدعة ببساطة:
فيه منتج حقيقي والدفع عند الاستلام والمنتج ما فيه اي خراب بس ما يستاهل ولا ٥٠٪ من السعر اللي بياكله الضحية

انا اعرض منتج وعندي ١٠ معرفات في الموقع

المعرف الاول يسومه بمبلغ ١٠٪ من السعر اللي يستاهله المنتج وهذا اسمه السنارة

يجي الضحية يشوف المنتج يستاهل اضعاف السومة

المسكين يفرق السومة ويظن انه كسبان

هنا يدخل المعرف الثاني ويزود شي بسيط

الضحية يفكر المنتج بيروح عليه وسعره للان مغري

يدخل المعرف الثالث يزود شوي

هنا الضحية يتحول المنتج في نظره من سعره مغري إلي أن المنتج مغري بدليل كثرة المزايدين فيحلى المنتج في عينه ويصير ضحية لمزايدات وهمية

والنتيجة يشتري منتج باغلى من سعره في المحلات

مثل الشاشة اللي بغيت اتخوبر فيها

الحل

اعرض سومة وحدة فقط للمنتج وانسحب مع اول مزايدة والسوق كبير واترك عنك فكرة فرصة لا تتكرر فكل شي الان يتكرر الاف المرات.

qahtani999 20-08-2020 04:06 AM

رد: مزايدات موقع حراج #خدعة
 
مثل الحاصل مع السيارات الصينية اسعارها نفس اسعار الياباني و تنباع اكثر

أنا السعودي 20-08-2020 04:09 AM

رد: مزايدات موقع حراج #خدعة
 
اقتباس:

المشاركة الأصلية كتبت بواسطة qahtani999 (المشاركة 42044466)
مثل الحاصل مع السيارات الصينية اسعارها نفس اسعار الياباني و تنباع اكثر

السيارات انت حافظ اسعارها وسعرها مرتفع فبتتردد في السوم وصعب خداعك

لكن ابو ٥ الاف وتحت سهل تنخدع والمنتج اصلا ما تعرف كم قيمته بدقة

مثل الشاشة توقعتها ب ١٦٠٠ صارت ١١٠٠

بسام البسام 20-08-2020 04:13 AM

رد: مزايدات موقع حراج #خدعة
 
الموقع ،،، بحاجة لضبط أكبر ،،، وحوكمة

فيه غش وخداع ومحتالين وأجانب شغله موقع حراج فقط
نصب واحتيال


ولاكن لا احد ينكر بأن فيه صدق ،، وموقع نماء بسرعة كبيرة

ويرتاده ملايين الزوار وتعرض فيه الاف السلع

ومواقع التواصل الاخرى بعيدة عن منافسته

مراقب أسهم 20-08-2020 04:13 AM

رد: مزايدات موقع حراج #خدعة
 

كلامك صحيح إلى حد كبير

وخاصة بعض السومات الغير منطقية

بسام البسام 20-08-2020 04:14 AM

رد: مزايدات موقع حراج #خدعة
 
اتمنى والله بما انه موقع وطني

أن يطور ويخضع لرقابة صارمة في عمليات البيع والشراء

نواف الحريري 20-08-2020 04:22 AM

رد: مزايدات موقع حراج #خدعة
 
لاحظت كثير من السومات هدفها تخريب البيع ورفعة لاسعار عالية ولا اعلم الهدف من ذلك

yazn4u 20-08-2020 04:44 AM

رد: مزايدات موقع حراج #خدعة
 
فعلا. فيه سومات غريبه وتحس المقصود فيها ضحيه بعينه. وهو مايدري.

المحير990 20-08-2020 05:04 AM

رد: مزايدات موقع حراج #خدعة
 
موقع حراج ارض خصبه للمحتالين لدرجه بعضهم يعرض سلعه ويحط رقم بدون اسمه واذا نويت الشراء قال حول عربون ويبيك تثق يرسل لك صورة هويه واتس مهيب له تثق بتحول له ع الراجحي يقولك لا ماعندي الا بنك ساب تدري حول ع حساب سواقي في الراجحي .. بعدها يطقك حظر تكتشف انه نصب عليك

الإدارة العامة 20-08-2020 05:09 AM

رد: مزايدات موقع حراج #خدعة
 
بعضهم تجار في نفس الموقع

اذا احد نزل بضاعه نفس البضاعه اللي عنده يدخل بمعرف اخر ويرفع بالسلعه حتى الزباين ماياخذونها ويتجهون له

وبعضهم يدخل بمعرف اخر يزايد في سلعته حتى يدبسها بزبون مايعرف قيمتها الاصليه

الحُب السعودي 20-08-2020 05:59 AM

رد: مزايدات موقع حراج #خدعة
 
الموقع مرتع للحرامية والنصابين
وبه خواص تجعل الحرامي يستمر ومنها:-
تمكين المعلن من حذف الرد وهذا يساعد على منع كشفه للاعضاء
تمكين العضو من حضر ردود من يفضحه وهذا يساعد على منع كشفه للاعضاء
تمكين العضو من حذف التقييم وهذا يساعد على منع كشفه للاعضاء

هواميركو 20-08-2020 06:14 AM

رد: مزايدات موقع حراج #خدعة
 
اقتباس:

المشاركة الأصلية كتبت بواسطة أنا السعودي (المشاركة 42044471)
السيارات انت حافظ اسعارها وسعرها مرتفع فبتتردد في السوم وصعب خداعك

لكن ابو ٥ الاف وتحت سهل تنخدع والمنتج اصلا ما تعرف كم قيمته بدقة

مثل الشاشة توقعتها ب ١٦٠٠ صارت ١١٠٠

المفترض وأنا اخوك
حينما تريد شراء سلعة تشوف أسعارها بالاسواق وتعاينها على أرض الواقع
او بمواقع الشركات المعروفة والموثوقة على النت وتتأكد من سعرها
وإذا جزمت تشتري منهم فهذا في نظري هو الاسلم والاكمل والافضل
من ناحية جودة البضاعة والضمان الممنوح من الوكيل وتتحمل فرق السعر
في سبيل استلام بضاعة عاينتها وعرفت جودتها ووثقت بالبائع
وضمنت بعد توفيق الله أنك ستستلمها كما عاينتها .

أما إذا تغاليت السعر وقلت يمكن القى نفس البضاعة
بمواقع المستعمل او بمواقع عروض السلع المستعملة
عندها يكون لديك معرفة بسعر السلعة وتقدر تفاصل مع البائع
عاد وصولها من عدمه او كذب البائع وغشه او تكون السلعة غير المعروضة بالموقع
هذي كلها أشياء بعلم الغيب وعليك التحوط والحذر حتى لا تقع فيها
أو تكنسل الفكرة وتريح راسك من الصداع والوقوع بحبال النصابين والمحتالين .

مثل هذه المواقع لا أشتري منهم سلع بمبالغ كبيرة
بل سلع بمبلغ بسيط حتى لو حصل نصب وأحتيال يكون بمبلغ بسيط
او حتى أسلم وأضمن حقي يكون تسليم المبلغ عند الاستلام والمعاينة
مع دفع عربون بسيط 50 او 100 ريال
او تتكنسل البيعه .

يسر الله أمرك .


02:45 AM

Powered by vBulletin® Version 3.8.11
Copyright ©2000 - 2021, vBulletin Solutions, Inc.
Search Engine Optimisation provided by DragonByte SEO v2.0.43 (Pro) - vBulletin Mods & Addons Copyright © 2021 DragonByte Technologies Ltd.
جميع المواضيع و الردود المطروحة لا تعبر عن رأي المنتدى بل تعبر عن رأي كاتبها وقرار البيع والشراء مسؤليتك وحدك