أخذت محل بأحد مولات المراكز العربيه وهذا ما أشاهده يوميا بعد ١٢ ليلا
 

طبعا هالفتره يغلق المول ويدخل أصحاب الكشكات لترتيب البضايع وتلميع الرفوف ومراجعه الدخل والحسابات
فعليا فعليا اكثر من ٩٠% من الكشكات بهالمولات المؤجره أصحابها أفراد يمنيين وقله من المصريين
أتكلم عن كشكات الجوالات والاكسسوارات والساعات
اما العطور فأصحابها غالبا من عرب الشمال ولايحتاجون للحضور ليلا
الأمر المخيف أسماء مؤسسات المتسترين تلقاها مسجله بأسماء أشخاص مجنسين او من مدن حدوديه لليمن والله على ما أقول شهيد
وأنا على أتم الاستعداد للتعاون للقبض على ٩٠% من هالتستر شرط توفر كافة الامكانيات من الجهات الحكوميه المختصه بحملة التستر
ولله ولله ان بعضهم لما أسألهم عن أصحاب الكشكات وينهم ما أشوفهم انه يصرح لي علنا بأنه المالك الفعلي للكشك وان فلان فقط حق توقيع أوراق ماله من الأمر اي شي
أحد المرات شفت اليمني مع المتستره قسم بالله تحسه هو المعزب وهي تمشي وراه كنها موظفه
يوم فتحت تفاجئو أصلا اني سعودي وفاتح محل بالمول ويسألوني المحل تبع فلان
فلان هذا يمني معروف بالمول نفس اختصاصي وقريب لبضاعتي عشان كذا يحسبون المحل له
قلت يخسي لاهو ولا عشره من أشكاله
والمصيبه عند الجمله مظطر أشتري أعلى من فلان لأن تجار الجمله من نفس الجنسيه ويراعون بعضهم بالأسعار
بس انا داخل ومستعد لتكسير الأسعار حتى إخراجهم لو أجلس سنوات
اذا ماطلعو بالنظام راح أطلعهم بقوة رأس المال ان شاء الله

أمر أخر أراه
يراقب اليمني من بعد مبيعات كشكه وتعامل الموظفه مع الزباين واذا حصل مفاوضات سعريه تستدعيه الموظفه ليراعي بالسعر ليحصل البيع فدائما تلقون حول هالكشكات شخص بثوب مسوي سعودي لكن يجلس يفر عالكشك بشكل مستمر ودائم

كله مكشوف والله

ووجود قرارات من الجهات العليا
لكن التنفيذ لا يوجد بنفس قوة التعليمات
!!

وين المشكلة ..؟

أحد الموظفات الي عملت لدي بالمحل أخبرتني انها كانت تعمل بالكشك الفلاني للجوالات وصاحبها يمني اسمه فلان لكن يدخل بتوكلنا سعودي متستر عليه
قلت وش يثبت قالت ناديه بسمه الحقيقي اذا مر
المهم مر قدام المحل ناديته فلان والتفت لي قال تعرفني
قلت انت فلان حق كشك الجوال قال لا انا فلان(اسم السعودي) قلت اوك وريني توكلنا أشوف ولا أنادي لك السكرتي
قام يترجاني اني أستر عليه وانه يوكل عياله عيش وهذا رزقي لاتقطعه
تخيلو الى أين وصلت الجرأه يدخلون بتوكلنا سعوديين وهم ماهم سعوديين ولا محصنين
ويدخل المول وياخذ الفلوس ويملع القزاز ويدخل بضايع ويصفها ويمشي

جيت ببلغ عالتستر التجاري يقول ارفع صور او تسجيل كل شي مثبت عند كاميرات المول والاداره تخليهم يدخلون بالليل ويعرفونهم تمام المعرفه
التستر بالمحلات بمولات المراكز العربيه فيها ندره لأن أكثرها تبع الحكير وأشخاص معروفين مثل الشايع والقرعاوي
المتسترين بالكشكات مخالفاتهم كثيره وكبيره غير التستر من تقليد علامات تجاريه الى تهرب ضريبي

اليوم كنت في المول في محل سنت… الخ لقيت قطعة اثاث فاخذتها .. بعدها لقيت القزازه مكسوره فقلت اسال الموظفه هل تقدر تكلم المدير لجل تعطيني اياها بسعر اقل
فقالت دقيقه اناديه لك.. وجاني الهندي .. وفعلا اعطاني خصم 50٪ !

للاسف السعوديين في الواجهه وبرواتب متدنيه والراس الكبير اجنبي

هذا بلا أبوك ي عقاب
!!

كل شيء واضح

عصابات ومستفدين
وناس تغطي
وناس تدفع

يبيلهم إلتفاتة كبرى وتطهير شامل
وتسفير الأجنبي المُخالف
وغرامة على السعودي تصل لحد شطب رخصته
في حالة التمادي وتكرار مخالفته

تزين بحول الله

تخيل من قوة التزوير يحطون موظفات يمنيات ويفتحون توكلنا لسعوديات ولله العظيم يمنيه تقدم عندي قالت مالك شغل انا أدبر نفسي اشتغلت عند فلان سنه كامله يمرو علي مكتب العمل واطلع توكلنا السعوديه هههههههههه
قلت وريني مقفاك ناقص أصير مزور مع مزوره
ولله لو بالحمله حقت مكتب العمل موظفات ويكشفون عليهم ويتأكدون انهم نفس السعوديات الموظفات ان يطلعون مصايب
بعض الموظفات الأجنبيات يتخابرون مع بعضهم بقروب اذا صار تفتيش تطلع من الكشك لين يمشون المهم مايصيدونهم المصيبه صارو يتكلمون مثلنا أتوقع انهم مواليد السعوديه والله أعلم

بلاوي متلتلة

يبيلها وزراء ووكلاء عندهم طاقة وجهد وجَلَد
لمتابعة من هم تحت مسؤوليتهم

وتتم محاسبتهم بالأرقام المُحققة
مش تصاريح تلفزيون وجرائد

أسهل طريقه يمنعون دخولهم بعد ١١ مساء وشف وش يصير
أو تحدد المولات والاسواق كأماكن محظوره بتوكلنا وفي حال رصد أي مقيم عربي يدخل خلال فترة الاغلاق يتم فحص ملفه ومعرفة
او في حال الشك نقل كفالته لشخص أخر يبحث عن نفس مهنته بالاقامه خلنا نشوف كفيله وش بيسوي وقتها وكيف يسدد الايجارات العاليه للمول