ياقصيم العز فيك الضيـف والله طـاب فالـه
في عنيزه خصّ يلقا الضيف كل قدر وحشيمه
أستحالـه فيـه مثلـك أستحالـه وأستحالـه
ياعظيمـه ياعنيـزه وياعنيـزه ياعظيـمـه
ياعنيزه ياعنيـزه والرشـا فـوق المحالـه
ولاغرفتك غير من صدر القصيد ومن صميمه
شاعر وبك همت يارمـز الثقافـه والأصالـه
وأقسم إني قبل أهيمك مالقيت اللـي أهيمـه
يالنفود أم الغضى فيك الهـواوي راق بالـه
أشهد إن الحي لو ماجاك عمـره دون قيمـه
كم خلاوي بك يشـب النـار ويبهّـر دلالـه
ولو يمـرّه ورع ينشـد ماتـردد بالعزيمـه
ميزة أهلك ياعنيزه بالبشـر كسـب الجمالـه
وكل من يعيش بك عنـي أنـا إنـه ستيمـه
كل ناسك ماتهـاب إلا الولـي جـل جلالـه
ناصرين الدين وفدوه للوطن عن من يضيمه
ياعنيزه وش يكون المجد لو مابـك رجالـه
ومن يكون الزين لو ماكان بك أجمل حريمـه
والله إنك فوق راس الأرض تاج أنتي جمالـه
وأنتي ياباريس نجـد الفاتنـه والمستقيمـه
فيك شامخ النخيـل يلامـس الغيـم وخيالـه
ومستغيثك لو طلب الله رحمـه جتـك ديمـه
عامرين بيوت ربي كل شايـب مـع عيالـه
أهل دين واهل خير وأهل طيب وأهل شيمـه
البدو مع الحضر أخوان وكـل ٍ فـي مجالـه
والمحبـه بينهـم تـزداد بقلـوب ٍ رحيمـه
ياعنيزه مغرمك يحذف مـع الغتـره عقالـه
لاتذكر طيـب أهلـك مـع لياليـه القديمـه
ليتني أعيش بك فـي أي وضـع وأي حالـه
حتى لو مسجون بك ومرتكب لأكبر جريمـه
يكفي إني فيك عايش ياهنـا العمـر ودلالـه
والتحف أطراف ليلك وأتنفس مـن نسيمـه