اول مشاركة وسعو صدوركم قصائد تصف سوق الاسهم

27-05-2005, 02:01 AM

المشاركه #1

عضو موقوف

تاريخ التسجيل: May 2005

المشاركات: 165

اول مشاركة وسعو صدوركم قصائد تصف سوق الاسهم

والصبر زين إلا بسهم المواشي

ألف : وألف وأول السوق نسبه = نسبة تحت ما عاد تحتاج حسبة

سوق ضربنا فوق عشرين ضربة = والصبر زين إلا بسهم المواشي

والباء : بدينا وأشترينا وبعنا = وياليتنا فيما كسبنا قنعنا

طرنا وتعلينا ولكن وقعنا = والصبر زين إلا بسهم المواشي

والتاء : توقعنا تزيد المكاسب = وقلنا نبي نشرب لذيذ المشارب

لكن ورطنا بين عارض وطالب = والصبر زين إلا بسهم المواشي

والثاء : ثبت عندي بعلم يقيني = اني خسرت وراح ما في يميني

الله على تسديد ديني يعيني = والصبر زين إلا بسهم المواشي

والجيم : جمعنا سهوم كثيرة = ولا درينا أن الدعاوي خطيرة

حتى خسرنا والخسارة كبيرة = والصبر زين إلا بسهم المواشي

والحاء : حسافة يا جماعة فلوسي = حطيتها بأسهم وكسّرت قوسي

صحيح هالدنيا عطتنا الدروسي = والصبر زين إلا بسهم المواشي

والخاء : خلاص اقول توبه ولا أعود = لو كنت بالمكسب موصى وموعود

وهذا قرار ما علي فيه منقود = والصبر زين إلا بسهم المواشي

والدال : دجينا بسهم المواشي = نشريه غالي ثم نبيعه بلاشي

هذا جزاة اللي شرا بالخشاشي = والصبر زين إلا بسهم المواشي

والذال : ذاك اللي تسبب علينا = ويلاه لو انه يطيح بيدينا

من دون ذبحه كلنا ما رضينا = والصبر زين إلا بسهم المواشي

والراء : رمينا رمية دون رامي = وصابت وقلنا حرفنة ياسلامي

السوق طيب لين جانا الصرامي = والصبر زين إلا بسهم المواشي

والزاي : زدنا يوم شفنا المرابح = وقمنا مع العالم نزيد المطابح

ويمكن على بعض السهوم انتذابح = والصبر زين إلا بسهم المواشي

والسين : سوينا بها فاهميني = نشري نقول السوق بكره يزيني

نبغى المكاسب وأثرنا خاسريني = والصبر زين إلا بسهم المواشي

والشين : شاري يومه السوق غالي = ما همني لو زاد فيها ريالي

لا والله الا راح باقي حلالي = والصبر زين إلا بسهم المواشي

والصاد : صدق اللي سهما منول = حول ميه وسبعين واليوم حول

ينزل الى ستين شي يهول = والصبر زين إلا بسهم المواشي

والضاد : ضاربنا بسهم الفنادق = لكن رمونا مثل رمي البنادق

حتى زبنا بالحفر والخنادق = والصبر زين إلا بسهم المواشي

والطاء : طمرنا طمرة دون داعي = نبغى النسب بالباحه أو بالجماعي

واليوم يكفينا حليب المراعي = والصبر زين إلا بسهم المواشي

والظاء : ظلمني من نصحني بتعمير = ويقول لي هذا السهم مكسبه غير

وانا مطبح فيه من دون تفكير = والصبر زين إلا بسهم المواشي

والعين : عيوا يرفعون المؤشر = يمكن سياسة سوق لازم يخسر

كم واحد من ذا المؤشر مدمر = والصبر زين إلا بسهم المواشي

والغين : غيّر يالمحافظ وبدل = موضوعنا حله وبالسوق عدل

نظامكم ما هو كتاب منزل = والصبر زين إلا بسهم المواشي

والفاء : فتيحي مشترينه بطمعه = لكن جانا منه عشرين قمعه

ما اظن يستاهل حسابه وجمعه = والصبر زين إلا بسهم المواشي

والقاف : قالوا بكره السوق يرتد = والوضع اشوفه كل يوم يتعقد

مقرود يامن طاع شور المقرد = والصبر زين إلا بسهم المواشي

والكاف : كافي يا وزير التجارة = خمسين بالميه علينا خساره

ان كان تفهم في فنون الاداره = والصبر زين إلا بسهم المواشي

واللام : لبنى يوم أغارت بلا خيل = خذت بسطوتها سهوم الرجاجيل

وخلت مدامعهم تبل المناديل = والصبر زين إلا بسهم المواشي

والميم : ما تنفع سهوم العوايد = خسرانة وما عاد فيها فوايد

الفايده بالكاش لا صار زايد = والصبر زين إلا بسهم المواشي

والنون : نادوا من يعرف السلومي = وقولوا توجه يم شيخ القرومي

يحلها لا صار وقت اللزومي = والصبر زين إلا بسهم المواشي

والهاء : هروج كل يوم تعادي = كل يسوي فاهم ٍ واقتصادي

ياطيبكم عند العشاء والمنادي = والصبر زين إلا بسهم المواشي

والواو : وهقنا المسمى ابراهيم = يقول انا بقلب جميع المفاهيم

ياعزتيله علقوه الشغاميم = والصبر زين إلا بسهم المواشي

والياء : ياربي طالبك ترحم الناس = وان تنتقم يارب من فعل الأنجاس

ولا باس ياللي صابه الهم لا باس = والصبر زين إلا بسهم المواشي ..!!

لبنى = لبنى العليان

ابراهيم = ابراهيم الراجحي

منقول للكاتب او الشاعر : شهبندر الأسهم
/10.gif... /10.gif... /3.gif....

كثيرون يعلقون السبب على ( ابراهيم الراجحي ) الذي يقولون انه ذبح المساهمين على الطريقة الاسلامية فكل شيء في بنكهم اسلامي :)
والله أعلم

واجمل ما قرأت في ذلك هذه القصيدة لراعي مرات :)

والله يعوض المتضررين خير ان شاء الله

ياسلام الله على( مكه).. و(طيبه).. و(الجماعي)
.................................. عد وبلٍ هلت مزونه وأنا عيني تخيله

مرحبا (بالكهرب) إللي فز من مرقده واعي
...................................شال حملٍ فوق حمله واضحت حموله ثقيله

وش نرقع في ( الغذائي) صارت شقوقه وساعي
................................... شف (لجين) اليوم شارد رافعٍ بيده شليله

ماذبحني ياجماعه غير( صدقٍ) و( الصناعي)
....................................و(الزراعي) مانفعني صار طعمه حنضليله

و( المواشي) في الصحاري ضايعه من غير راعي
.....................................يا عسى ربك يسهل للمؤشر من يشيله

المؤشر لانزل ياخوي يكسر لي ذراعي
...................................والنسب لامن توالت زادت الحمى مليله

حسبي الله ياجماعه راح مجهودي وضاعي
.................................. كل ما أملك راح لحظة مابقى00 غير الفشيله

ليت من هو قبل مده ( صفا) محفظته وباعي
...................................كانا أنا سالم.. وغانم.. ماغدت نفسي عليله

والتشكي.. والتبكي .. عارفٍ مافيه داعي
..................................ليه انا امشي في الغداري مامعي فيها دليله

مالقينا من يجاوب مالقينا من يراعي
.................................ضاعت الطاسه وكلٍ ماعرف من هو قبيله

ماسمعنا اللي يصوت ما سمعنا اللي يداعي
.................................. مالقينا في زمنا فارسٍ زبـــــــــــن دخيله

ياكثر من راح فيها علقت هم بالكراعي
..................................وكل شخصٍ طاح فيها مالقى إللي يرتكي له

لاتعجل في أمورك لاتجيها بإندفاعي
..................................التأكد والتركد مامثلها مـــــــن وسيله

والمصيبه كان حلت ما يغطيها قناعي
.................................ول ياحظ التعاسه دنيتي دايـــــــم بخيله
للشاعر : راعي مرات
وقصيدة اخرى ايضا حلوة :

يا من يرد الثور لم الحظيره*** الثور هايج والحواجز كسرها

ياناس حال الناس صارت خطيره***كم من بيوت من قرونه دمرها

وان كان ابن عساف ماله بصيره***عميان قلب وحيلته ماقدرها

صيحوا لابو يمناً قويه شطيره***عساه ابو متعب يكافح خطرها

الشعب يصرخ والخساير كبيره***الراجحي وكلابته شف ضررها

كم من يتيم ومن عجوزٍ فقيره***قامت تنتف من قهرها شعرها

المال ضاع وضاعت اشياء كثيره***حالٍ ولايرضاه حتى كفرها

الموضوع الأصلي : اضغط هنا || المصدر :
الملتقى الــــــعـــــــام للهــــــوامــــــــيــــــــر

27-05-2005, 02:10 AM

المشاركه #2

كنعد بدون شوك

عضو هوامير المؤسس

تاريخ التسجيل: May 2005

المشاركات: 7,766

والصبر زين إلا بسهم المواشي ...

فيه واحد في هالمنتدى معدلها للجين ...

((والصبر زين إلا بسهم اللجين))

عالعموم قافية الألفية تقبل كل شي ...

شكرا لك ..

اول مشاركه ... يسلمووووو

وحقت راعي مرات شيييييييييي غريب ...

27-05-2005, 02:35 PM

المشاركه #3

نحال ضارب سهم

عضو هوامير المؤسس

تاريخ التسجيل: May 2005

المشاركات: 1,158

والصبر زين الا بسهم المواشي

قلها وأنت صادق من 3 شهور وأخوك صابر بسهم المواشي

من جرف لدحديرة

لكن صابر مادري ليش

يمكن علشان من شبابي وأنا أرعى في الغنم فاحببتها عند دخولي الاسهم ولاحول ولاقوة الا بالله

04-11-2006, 06:48 PM

المشاركه #4

عساف السهم

عضو هوامير المميز

تاريخ التسجيل: Feb 2006

المشاركات: 317

والصبر زين الا بهالسوق البايييييييييييييييييييييييييييييييييييييييييييخ

الكلمات الدلالية (Tags)

أدوات الموضوع
مشاهدة صفحة طباعة الموضوع

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة قوانين المنتدى

الانتقال السريع

اجعل كافة الأقسام مقروءة

07:25 AM

اول مشاركة وسعو صدوركم قصائد تصف سوق الاسهم

الملتقى الــــــعـــــــام للهــــــوامــــــــيــــــــر

مشاركة

وسعو

الاسهم

اول

تصف

سوق

صدوركم

قصائد

اقرا ايضا

اعلان هام جداً ارجو تواجد الجميع للاهمية

قولوا لبو متعب ترى الشعب مقهـور ** ياخـادم البيتيـن امسـك عصـاهـا